Riti i synetllëkut i kryer ilegalisht dhe i praktikuar nga familje emigrantësh me besim mysliman, po përhapet çdo ditë e më shumë në Itali e jo pak herë me rreziqe fatale.
Motivet e kryerjes së këtij riti ilegalisht është se në Itali autorizohet vetëm për shkaqe shëndetësore e nën kërkesën e mjekut pediatër, por dhe pagesa e operacionit, shpesh herë e papërballueshme nga familjet e emigrantëve.
Në një strukturë publike, kosto e këtij operacioni është nga 250-400 euro e në një strukturë private ku operacion kushton dhjetëfish fish më shumë nga 2500 euro-4000 euro.
Sipas statistikave në nivel kombëtar çdo vit 4000-5000 fëmijë nga familje emigrantësh në Itali, mes të cilëve dhe shqiptarë, për motive fetare, kulturore e higjienike, i nënshtrohen kryerjes së operacionit të synetllëkut.
1400-1800 prej tyre e që përbëjnë 35% të rasteve, kryhen në mënyrë ilegale, pra jo në një strukturë të specializuar mjekësore, herë nga vetë prindërit e herë nga persona jo profesionalë me një kosto të ulët 50-100 euro.
E ky fakt bën që rreziqet e këtij operacioni të jenë të larta, nga infeksioni trupor, hemorragjia e deri në fatalitet.
Më 2016 në Torino një foshnjë 1 muajsh me prindër nga Afrika humbi jetën pas një operacioni synetllëku të kryer në kushte shtëpiake.
Para tij raste të ngjashme ndodhën në Treviso e Bari, e rasti i fundit një ditë më parë në qytezën Scandiano në Reggio Emilia.
Vogëlushi 5 muajsh ndërroj jetë pas ndalimit të zemrës në spitalin e Bolonjës, vetëm pak orë pas ritit të synetit kryer në kushtet shtëpiake e nga vetë prindërit.
Një vit më parë në Monterotondo, vetëm pak kilometra larg Romës, viktimë e këtij riti mbeti një vogëlush 2 vjeç, fëmijë i një familje emigrantësh nga Nigeria, ndërsa vëllai i tij binjak mundi të mbijetoj pas disa javësh në reaminacion në rrezik për jetën, shkruan ora news.
Në të gjitha rastet prindërit janë përballuar me drejtësinë italiane nën akuzën e vrasjes së qëllimshme.
Pas rastit të fundit në Reggio Emilia, Kryetari i shoqatës së mjekëve të huaj në Itali, Foad Aodi i bën apel shtetit italian për hartimin e një ligji kombëtar që autorizon strukturat publike e private të lejojnë kryerjen e operacioneve të tilla me kosto të lejueshme për të gjithë, për të garantuar shëndetin e vogëlushëve si dhe evitimin e kryerjes së operacioneve në mënyrë ilegale.
Supozohet gjithashtu se numri i fëmijëve të emigrantëve të besimit mysliman që jetojnë në Itali e që i janë nënshtruar ritit të synetllëkut është shumë më i lartë se statistikat vendase, pasi mjaft prej tyre e kryejnë atë në vendin e origjinës së prindërve.
g.kosovari
