Situata e Elseid Hysajt mund të kishte qenë krejtësisht ndryshe nëse mbrojtësi i përfaqësueses shqiptare do të kishte pranuar një ofertë mjaft të mirë që i mbërriti në verën e kaluar.
Nga përtej Adriatikut bëjnë të ditur se një klub i madh gjerman kishte kërkuar futbollistin shqiptar, duke ofruar edhe një shifër të konsiderueshme për kartonin e tij, por ajo ishte kthyer mbrapsht.
Umberto Kiarelo, gazetar i njohur italian, ka deklaruar në një emision televiziv për “Canale 21” se Hysaj ishte shumë pranë lamtumirës. “Një klub shumë i rëndësishëm gjerman dëshironte të paguante 30 milionë euro për të pasur Hysajn në fundin e sezonit të kaluar. Ky është një informacion i sigurt i konfirmuar.
Por reagimi i futbollistit dhe ai i menaxherit të tij, Mario Xhiufredi, ishte që të qëndronte, aq sa i rregulluan kontratën me një përmirësim financiar. Kësisoj, shqiptari qëndroi aty ku ishte. Por sot, 30 milionë ndoshta nuk i vlen më”, tha Kiarelo, duke e cilësuar këtë një mundësi të humbur për Napolin që të fitonte financiarisht nga transferimi i futbollistit.
