Shtatë persona të lënduar, mes tyre edhe fëmijë. Ky është bilanci i një zjarri që shpërtheu rreth mesnatës në një ndërtesë në Rimini dhe flakët nga kati i parë arritën shpejt në banesën e katit të dytë, banuar nga një familje prej shtatë personash, me origjinë shqiptare.
Teksa edhe shtëpia e tyre po përfshihej nga zjarri, të shtatë shqiptarët, duke përfshirë disa fëmijë mes tyre, janë hedhur nga dritarja për t’i shpëtuar flakëve. Sipas mediave italiane, zjarri shpërtheu brenda një banese të pabanuar, në katin e parë të një ndërtese në Via Cagnacci.
Në familjen shqiptare që banonte në katin e dytë, jetonin mamaja, babai, katër fëmijë dhe xhaxhai. Para ardhjes së zjarrfikësve, ishin fqinjët ata që për të shpëtuar fëmijët kanë përdorur dyshekë e batanije duke i hedhur nga tarracat.
Pasojat më të rënda janë për një nga fëmijët e familjes, 7 vjeç dhe nëna 31 vjeçare. Në spital janë dërguar edhe babai 40 vjeçar, njëri nga fëmijët e tyre vetëm 3 muajsh, dhe dy fëmijët e tjerë 8 dhe 4 vjeç. Ndërsa xhaxhai i tyre 30 vjeç ka marrë dëmtime të lehta.
MA.ME
