Dy shtetas shqiptarë janë arrestuar nga policia italiane, pasi u kapën me 2.6 kg heroinë.
Bëhet fjalë për Seli Dervishi 33 vjeç dhe Eglantin Milaqi 30 vjeç, emra të njohur për policinë italiane pasi edhe më herët ishin marrë me trafik droge.
Të dy ”korrierët” janë kapur në një stacion karburanti mes Foggia dhe Manfredonia, kur shqiptarët manovruan për t’i shpëtuar efektivëve dhe u përpoqën të fshehnin drogën, duke e hedhur nga dritarja e makinës së tyre.
Duke u përpjekur të largoheshin, një nga shqiptarët që drejtonte makinën ka shtuar shpejtësinë dhe është përplasur me një makinë policie.
Oficerët kanë qëlluar në ajër për të frikësuar shqiptarët dhe në ndjekjen si nëpër filma, kështu si e përshkruajnë mediat italiane, polici qëlloi përsëri, këtë herë duke goditur një nga gomat e përparme të automjetit. Ata lëviznin me një BMW me ngjyrë të zezë, me shumë shpejtësi. Ndjekja ka ngjallur panik në rrugë për shoferët e tjerë.
Më pas ata u kapën, jo pa vështirësi për shkak të rezistencës që bënë dhe u dërguan në burg.
