Me afrimin e verës dhe fillimin e sezonit turistik, përdoruesit e mediave sociale do të luftojnë për t’iu përgjigjur pyetjes së vjetër: Nëse nuk keni postuar për pushimet tuaja, a keni shkuar vërtet?
Përgjigja është, sigurisht Po. E keni bërë, dhe ndoshta keni pasur një kohë më të mirë për të mos postuar gjithçka nga pushimet në Instagram.
Megjithëse mund të jetë e vështirë për disa që t’i rezistojnë e-maileve të punës dhe përditësimit të mediave sociale gjatë pushimeve, ishulli Ulko-Tammio në Finlandë po u kërkon vizitorëve të injorojnë telefonat e tyre dhe të shijojnë natyrën.
Ulko-Tammio ndodhet në Gjirin Lindor të Finlandës, një park kombëtar në vendin nordik që është quajtur “vendi më i lumtur në botë” gjashtë vite me radhë dhe pretendojnë se janë ishulli i parë turistik në botë pa telefona.
Për ironi, ishulli është edhe shtëpia e Nokia-s, marka që qëndron pas smartfonit më të shitur në botë të të gjitha kohërave.
“Ishulli Ulko-Tammio, i cili ndodhet në brigjet e Hamina, do të jetë një zonë pa telefona këtë verë,” tha Mats Selin, një ekspert turizmi në një njoftim për shtyp.
“Ne duam t’i nxisim pushuesit të fikin pajisjet e tyre inteligjente, të ndalojnë së përdoruri ato dhe të shijojnë vërtetë ishujt.”
Një nga 41 parqet kombëtare të Finlandës, Ulko-Tammio është i pabanuar nga njerëzit, por është shtëpia e shumë zogjve dhe bimëve të rralla, të cilat vizitorët mund t’i shohin në një shëtitje përgjatë shtigjeve natyrore të ishullit ose nga kulla e shpendëve të ishullit.
Pjesëmarrja në detoksifikimin dixhital për turistët në Ulko-Tammio është vullnetare dhe, duke qenë se ishulli mbulohet nga një rrjet celular funksional, tundimi do të jetë gjithmonë i pranishëm.
Megjithatë, stafi i Parks & Ëildlife Finland, kompania që menaxhon ishullin, shpreson që fushata të përkthehet në rezultate, që turistët të shkëputen nga telefonat dhe të angazhohen me florën, faunën dhe vizitorët e tjerë.
“Fikja e telefonit, eksplorimi i natyrës dhe takimi me njerëz ballë për ballë do të rrisin disponimin dhe mirëqenien tuaj. Ne shpenzojmë orë të panumërta duke lëvizur burimet tona të mediave sociale, kështu që të marrësh një pushim të shkurtër prej tyre do të thotë që të kesh më shumë kohë për përvoja të reja”, tha në një njoftim për shtyp Sari Castrén, psikologe dhe menaxhere kërkimore në Institutin Finlandez për Shëndetin dhe Mirëqenien.
/a.r
