Dy ditë pasi ishte larguar nga shtëpia, policia ka gjetur 12-vjeçarin nga Durrësi. Pas thirrjeve të babait të tij, Gazmendit në emisionin “Me zemër të hapur” dhe kërkimeve nga policia, i mituri është gjetur në Sarandë.
Në një lidhje telefonike, babai i 12-vjeçarit me lot në sy deklaroi se sapo ishte njoftuar për gjetjen e të birit në Sarandë. Ai ishte nisur drejt qytetit bregdetar.
“Motra sa më erdhi një informacion, e kanë gjetur djalin. Unë tani jam në Fier, rrugës për në Sarandë. Faleminderit shumë të gjithëve, faleminderit ju, faleminderit Policisë së Shtetit”, tha babai.
Edhe shefi i policisë së Sarandës Syrja Bellaj konfirmoi gjetjen e djalit.
“Është në gjendje të mirë, po shoqërohet në Komisariat për t’u intervistuar dhe për të mësuar se çfarë ka ndodhur. Është vetëm djali”, tha ai.
Ishte vetë babai i cili ka njoftuar nëpërmjet rrjeteve sociale për largimin e të birit nga shtëpia teksa apelonte për ndihmë.
Mes lotësh dhe dhimbjes babai i 12-vjeçarit ka rrëfyer se ka ndodhur edhe herë të tjera largimi i tij nga banesa, por që nuk ka tentuar kurrë që të mos kthehej./m.j
