Edvin Kulluri, një nga zërat më kritikë ndaj kryetarit demokrat është ndalur të komentojë një nga akuzat e ardhura nga Basha, më konkretisht PD-ja e Shkodrës, se ka qenë Topalli ajo që e ka bërë pjesë të PD-së, Valdrin Pjetrin.
Në një status me nota të larta ironie, Kulluri mohon që një gjë e tillë të jetë e vërtetë, madje ka bërë një krahasim edhe me barkun fals të personazhit Marigo në filmin “14 vjeç dhëndër”. Ai tregon se Pjetrin e ka emëruar një tjetër person në Ministrinë e Financave në vitin 2010, por pa përmendur emër, ndërsa ka ironizuar Bashën duke e krahasuar në “Gjinon” në të njëjtin film.
“Kjo puna e Valdrinit që e paska emëruar Topalli drejtor na doli si jastëku i Marigosë tek 14 vjeç dhëndër! “Trimi” na paska qenë në oborrin e Bashës! Kështu është kur kryetarin e kemi Gjino! E ka emëruar tjetërkush në 2010 në ministrinë e Financave që është në KK te PD sot dhe jo Topalli siç e akuzoi pa turp Basha përmes një deklarate pa firme e vulë nga Shkodra dje”, shkruan Kulluri në rrjetin social Facebook.
Pas lajmit ku PD-ja publikoi dokumentet ku sipas tyre vërtetohej se Pjetri ka qenë i dënuar në 2003 në Itali për drogë, Topalli, një ndër figurat kryesore të PD-së, bëri një reagim të gjatë ku e bënte Lulzim Bashën ‘bashkëfajtor’ me Ramën, teksa mes të tjerave listoi një sërë kritikash dhe akuzash ndaj tij. E menjëhershme ka qenë reagimi i PD-së Shkodër, sipas të cilëve Topalli shfaqet sa herë që Rama është në vështirësi dhe me këtë rast sulmon Bashën.
/a.r
