Kryeministri britanik Keir Starmer po shqyrton mundësinë për të marrë drejtimin e NATO-s pasi të largohet nga Downing Street, raportojnë mediat britanike.
Sipas The Telegraph, Starmer është i interesuar për postin e sekretarit të përgjithshëm të aleancës, i cili aktualisht mbahet nga ish-kryeministri i Holandës, Mark Rutte. Mandati i Rutte përfundon në vitin 2028, përveç rastit kur të 32 vendet anëtare bien dakord për zgjatjen e tij.
Raporti thotë se aleatët e Starmer kanë nisur të promovojnë kandidaturën e tij, duke argumentuar se ai gëzon respektin e liderëve europianë, krijoi marrëdhënie të afërta me presidentin ukrainas Volodymyr Zelensky dhe la përshtypje pozitive gjatë samitit të G7, të mbajtur në fillim të këtij muaji.
Megjithatë, sipas The Observer, marrja e këtij posti nuk do të jetë e lehtë. Starmer do të ketë nevojë për mbështetjen e plotë të qeverisë britanike, ndërsa zgjedhja e sekretarit të përgjithshëm të NATO-s bëhet vetëm me konsensusin e të gjitha vendeve anëtare.
Lajmi vjen pasi Starmer njoftoi javën e kaluar se do të largohet nga Downing Street pas fitores së Andy Burnham në zgjedhjet e pjesshme në Makerfield. Megjithatë, një zëdhënës i Downing Street konfirmoi se ai synon të mbetet deputet deri në përfundim të mandatit.
Nëse nuk mbahen zgjedhje të parakohshme përpara vitit 2028, Partia Laburiste mund të përballet me vështirësi në zonën elektorale të Starmer, Holborn and St Pancras, ku sipas raportimeve të medias britanike, të Gjelbrit konsiderohen një sfidë serioze.
Starmer është kritikuar gjithashtu se i ka kushtuar më shumë kohë politikës së jashtme sesa çështjeve të brendshme. Sipas raportit, ai ka udhëtuar më shumë se çdo kryeministër britanik në historinë moderne gjatë së njëjtës periudhë në detyrë, duke përshkuar pothuajse dyfishin e distancës së Tony Blair. Në 17 muajt e parë të qeverisjes së tij, ai ka kaluar rreth dy muaj e gjysmë jashtë vendit.
Këtë të hënë, Starmer priti në Downing Street sekretarin e përgjithshëm të NATO-s, Mark Rutte, përpara samitit të aleancës që do të mbahet më 7 korrik në Ankara. Gjatë takimit, ai riafirmoi angazhimin e Mbretërisë së Bashkuar ndaj NATO-s, duke e cilësuar atë si “aleancën ushtarake më të suksesshme që ka njohur bota”.
Në samit pritet të diskutohet rritja e shpenzimeve bazë të mbrojtjes në 3.5% të Prodhimit të Brendshëm Bruto deri në vitin 2035. Debati është intensifikuar pasi ish-ministri britanik i Mbrojtjes, John Healey, deklaroi se fondet e planifikuara nuk janë të mjaftueshme për të arritur objektivat e NATO-s.
Nga ana e tij, Mark Rutte falënderoi Starmer për mbështetjen ndaj Ukrainës, rritjen e buxhetit të mbrojtjes dhe rolin e Britanisë në bashkëpunimin me aleatët. I pyetur nëse do të mbështeste një kandidaturë të ardhshme të Starmer për drejtimin e NATO-s, Rutte u përgjigj se aktualisht “nuk ka vakancë” për këtë post, por e cilësoi kryeministrin britanik si një lider me ndikim dhe nuk përjashtoi një kandidaturë të tij në të ardhmen.
