Një efektive policie, i ka shpëtuar mrekullisht vdekjes, pasi i dashuri i saj turk në përleshje e sipër, i ka rrëmbyer pistoletën e shërbimit dhe me të ka qëlluar tre herë, por fatmirësisht arma nuk ka shtënë. Ngjarja ka ndodhur në 25 nëntor 2013 ku efektivja e policisë Nerejda Laze, nënë e dy fëmijëve, pasi ka përfunduar punën, po kthehej në banesë. Me vete kishte marrë dhe disa ushqime, për fëmijët e saj. Por rrugës për në shtëpi është ndeshur me shtetasin turk Mujdat Sayan, me të cilin kishte pasur një lidhje dashurie dhe më pas ishte ndarë.
Siç raporton Shqiptarja.com, turku me anën e një thike e ka kërcënuar duke e detyruar që të shkonte e të bashkëjetonte me të, por efektivja e policisë e ka refuzuar.
“Ose do të bashkëjetosh me mua, ose do të vras fëmijët.” mësohet t’i ketë thënë shtetasi turk, efektives së policisë në sy të fëmijëve të saj.
Pas kësaj ai ka ushruar forcë duke e kërcënuar dhe goditur me thikë ku si rezultat i kësaj i ka prerë gishtin. Për vetëmbrojtje, policja ka nxjerë armën e shërbimit ku në përleshje e sipër, ish-i dashuri i ka marrë armën dhe me të ka qëlluar tre herë, por arma nuk është aktivizuar. Pas kësaj policja ka kërkuar ndihmë, ndërsa autori është larguar me makinë. Ai mundi të arrestohej dhe gjatë ditës së djeshme prokuroria ka kërkuar dënimin e tij me 27 vite burg për dy akuza të rënda.
