Një 20-vjeçare greke erdhi në Shqipëri që t’i kthejë ish të dashurit sendet personale, por e reja është rrahur dhe përdhunuar prej tij dhe më pas braktiset në rrugë pa para. Ngjarja e rëndë ka ndodhur mbrëmjen e 3 korrikut në qytetin e Patosit në shtëpinë e të riut Erjon Harrunaj, në lagjen “Mustafa Matohiti” dhe është denoncuar vetëm pak orë më vonë nga e dhunuara, e cila ka fajësuar 22-vjeçarin shqiptar.
Sipas burimeve të policisë, pas marrjes së kallëzimit nga e dëmtuara dhe kryerjes së ekspertimeve mjekoligjore është bërë shpallja në kërkim e 22-vjeçarit Erjon Harrunaj për veprat penale “dhunë në familje” dhe “marrëdhënie seksuale me dhunë me të rritura”.
E reja greke Maria S. kishte pasur një marrëdhënie intime me 22-vjeçarin Harrunaj kur ky i fundit jetonte në Greqi. Por, disa muaj më parë ata janë ndarë prej njëri-tjetrit dhe për këtë arsye mësohet se Harrunaj i ka kërkuar që 20-vjeçarja greke t’i kthente sendet e tij. Për këtë arsye, ajo ka mbërritur në Shqipëri paraditen e 3 korrikut, por kur ka shkuar të takojë ish të dashurin me qëllim që t’i jepte sendet personale, është ndeshur me dhunën verbale e fizike të këtij të fundit.
Mësohet se ai i ka kërkuar që të kryenin marrëdhënie seksuale për herë të fundit, por vajza greke nuk e ka pranuar një gjë të tillë, duke i shpjeguar se tashmë nuk ishin më të lidhur bashkë. Në këto kushte, 22-vjeçari e ka qëlluar dhe i ka bërë presion psikologjik e më pas ka kryer marrëdhënie seksuale me dhunë ndaj të resë. Pasi ka përfunduar aktin e dhunshëm, ai nuk e ka lënë 20-vjeçaren të marrë sendet dhe paratë e saj me vete, por i ka dhënë vetëm 70 lekë që nevojiteshin për biletën e taksisë nga qyteti i Patosit në atë të Fierit.
Vajza e dhunuar, pasi është larguar nga shtëpia e 22-vjeçarit Harrunaj ka mbërritur në qytetin e Fierit dhe është drejtuar menjëherë për në komisariat ku edhe ka kryer kallëzimin përkatës ndaj përdhunuesit të saj. Mësohet se pas marrjes së deklarimeve të së dëmtuarës është kryer edhe këqyrja dhe ekspertimi nga mjeku ligjor, i cili ka konstatuar shenja të dhunës.
