Ambasadorë dhe ish-ambasadorë të pushtetit të kaluar po i nënshtrohen një hetimi të imtësishëm, për fshehje të pasurive, si dhe për konflikt interesi. Së fundi, Inspektorati i Lartë i Deklarimit dhe Kontrollit të Pasurive dorëzoi në Prokurori dosjen e ish-ambasadorit të Jashtëzakonshëm dhe Fuqiplotë në Japoni, Bujar Dida.
ILDKP ka bërë ndaj tij një kallëzim për fshehje të pasurisë, pas një hetimi të bërë në deklaratat e dorëzuara prej tij, gjatë viteve që ishte në krye të Ambasadës shqiptare në Japoni. Dosja e tij i është dërguar organit të akuzës më 23 korrik të këtij viti, e cila tashmë është në dorë të Adriatik Llallës, për të vijuar hetimet dhe vërtetuar pretendimet e ILDKP. E njëjta gjë do të ndodhë dhe për diplomatët e tjerë që konstatohen me shkelje.
Në qershor të vitit 2014 ministri Ditmir Bushati i dërgoi një shkresë Presidentit Bujar Nishani, ku i kërkonte lirimin nga detyra të ambasadorit. Por deri në fillim të vitit 2015, kreu i shtetit nuk dha asnjë përgjigje. Në shkurt Bushati i dërgoi një tjetër shkresë presidentit dhe vetëm në mars ai e largoi ambasadorin nga detyra. Gjatë kësaj kohe ILDKPKI ka dyshime se, ish-ambasadori ka fshehur pasurinë, duke mos bërë deklarime të vërteta të saj.
Ndërkohë, në shënjestrën e inspektorëve të institucionit të kontrollit të pasurive mësohet se janë disa kryediplomatë shqiptarë në Evropë dhe në botë, pasi po verifikohen deklaratat e tyre të pasurisë për ndonjë shkelje./Shekulli/
