Ish-diplomati Arben Çejku ka kritikuar mënyrën se si diaspora po përfshihet në përplasjet e brendshme politike në Kosovë, duke argumentuar se një nga shtyllat historike të shtetësisë së vendit po përdoret sot si instrument në krizën institucionale.
Në një intervistë për TemaA, Çejku tha se diaspora ka pasur një rol të rëndësishëm në mbështetjen e Kosovës që nga periudha e regjimit të Sllobodan Millosheviqit dhe më pas gjatë luftës.
“Për fat të keq, diaspora po keqpërdoret në këtë rast, sepse diaspora është një vlerë, ka qenë një vlerë dhe një shtyllë serioze e shtetësisë së Kosovës”, tha ai. “Është ajo që e ka mbështetur Kosovën prej kohës kur ajo kishte shtetin paralel nën Millosheviqin, edhe mbështeti edhe luftën, edhe të gjitha.”
Çejku kritikoi përfshirjen e diasporës në përplasjen e fundit mes forcave politike, duke thënë se kjo po krijon ndarje edhe mes vetë përfaqësuesve të saj.
“Nuk është normale që tashmë të përdoret diaspora për një luftë të brendshme politike dhe të futet edhe në sallën e Kuvendit, duke e përqasur në një mënyrë të tillë që të ketë edhe një konfrontim brenda vetë anëtarëve të diasporës”, tha ai.
Duke iu referuar zhvillimeve në Kuvend, Çejku tha se përplasjet mes pjesëmarrësve krijuan një pamje të papërshtatshme për institucionin.
“Unë vura re që të gjithë ishin kundër të gjithëve dhe kjo ishte pamja më e shëmtuar që mund të ekzistonte në këtë Kuvend”, deklaroi ai.
Sipas Çejkut, diaspora mund të kishte një rol krejt tjetër në procesin e konstituimit të Kuvendit.
“Diaspora mund të ishte një dekor shumë i nderuar në konstituimin e parlamentit të ri. Nuk duhej të përdorej diaspora si një karburant për krizën, por duhej të dëgjohej për shqetësimet e saj dhe natyrisht të inkurajohej që të mbante lidhje më shumë me Kosovën”, përfundoi Çejku.
