Ministri i Mbrojtjes i Izraelit, Israel Katz, ka reaguar përmes një deklarate zyrtare, pak pasi u raportuar për një breshëri raketash të lëshuara nga Irani në veri të Izraelit mëngjesin e sotëm, disa orë pasi u konfirmuar se kishin rënë dakord për një armëpushim.
Katz njofton se i ka dhënë urdhër Forcave të Mbrojtjes së Izraelit (IDF) të “përgjigjen me forcë ndaj shkeljes së armëpushimit nga ana e Iranit, përmes goditjeve intensive ndaj objektivave të regjimit në zemër të Teheranit”.
Ende nuk ka një konfirmim zyrtar nga Irani për ndonjë sulm të ri me raketa, megjithatë, më herët ministri i Jashtëm iranian kishte theksuar se Irani do të ndalonte sulmet vetëm nëse edhe Izraeli do të zbatonte armëpushimin.
Ushtria izraelite njoftoi se kishte identifikuar raketa të lëshuara nga Irani dhe kishte aktivizuar sistemet e mbrojtjes ajrore, duke i kërkuar qytetarëve të futen në vende të sigurta.
Nga ana tjetët, media shtetërore iraniane kanë reaguar ndaj akuzave të Izraelit, duke deklaruar se Irani mohon kategorikisht që të ketë lëshuar raketa drejt Izraelit pas hyrjes në fuqi të armëpushimit.
Sipas raportimeve zyrtare nga Teherani, autoritetet iraniane i kanë cilësuar lajmet si të pabazuara dhe pjesë e një fushate dezinformimi.
Deklarata vjen pasi Izraeli akuzoi Iranin për shkelje të armëpushimit, duke pretenduar se kishte identifikuar raketa të lëshuara nga territori iranian, drejt veriut të Izraelit.
