Ministri i Jashtëm i Iranit, Abbas Aragchi, i kërkoi Bullgarisë të rishqyrtojë vendimin e saj për të lejuar vendosjen e përkohshme të avionëve ushtarakë amerikanë në bazën ajrore Bezmer.
Sipas mediave shtetërore iraniane, Aragchi pati një telefonatë me homologen e tij bullgare, Velislava Petrova-Chamova.
Gjatë bisedës, kryediplomati iranian tha se vendimi i Sofjes për të miratuar kërkesën e Shteteve të Bashkuara ishte i papranueshëm dhe sipas tij edhe në kundërshtim me marrëdhëniet tradicionalisht miqësore midis Iranit dhe Bullgarisë.
Qeveria bullgare ka thënë se në bazat e saj nuk do të vendosen armë për sulme dhe se ky veprim nuk e bën Bullgarinë palë në operacionet ushtarake.
Teherani ka paralajmëruar vazhdimisht vendet që lejojnë që territori i tyre të përdoret për operacione ushtarake amerikane kundër tij se ato mund të “përballen me pasoja”.
Aragchi zhvilloi gjithashtu një telefonatë me Ministrin e Jashtëm qipriot, Konstantinos Kombos, gjatë së cilës ai theksoi rëndësinë e parandalimit të përdorimit të bazave ushtarake të huaja në Qipro kundër Iranit.
Në Qipro ndodhen dy baza ushtarake britanike, përfshirë bazën ajrore Akrotiri, e cila u godit nga një dron iranian në fillim të marsit, disa ditë pas fillimit të luftës.
Britania e Madhe ka rënë dakord me Shtetet e Bashkuara për të lejuar përdorimin e bazave të saj nga forcat amerikane, por baza Akrotiri në Qipro nuk është e përfshirë në marrëveshje.
Irani mbajti të njëjtin qëndrim dhe paralajmëroi qeverinë britanike të mos e lejonte përdorimin e bazave nga Shtetet e Bashkuara.
