Autoritetet në Iran u kanë hequr akreditimin ekspertëve kryesorë për të inspektuar arsenalin bërthamor të vendit, tha dje Agjencia Ndërkombëtare e Energjisë Atomike (IAEA).
Shefi i IAEA-s, Rafael Grossi, kritikoi masën në një deklaratë zyrtare për shtyp, duke e quajtur atë joproporcionale dhe të paprecedentë.
“Kjo ndikon në planifikimin normal dhe kryerjen e aktiviteteve të verifikimit të Agjencisë në Iran dhe haptazi kundërshton bashkëpunimin që duhet të ekzistojë midis IAEA-s dhe Iranit”, shkroi ai nga selia e agjencisë në Vjenë.
Një inspektori i ishte hequr më parë akreditimi. Megjithëse masa është zyrtarisht e lejuar, Grossi kritikoi Iranin për pengimin e IAEA-së për të kryer në mënyrë efektive inspektimet e saj në Iran.
“Me vendimin e sotëm, Irani ka hequr në mënyrë efektive rreth një të tretën e grupit kryesor të inspektorëve më me përvojë të Agjencisë të caktuar për Iranin”, tha Grossi.
“Ky vendim nga Irani është një hap tjetër në drejtimin e gabuar dhe përbën një goditje të panevojshme për një marrëdhënie tashmë të tensionuar midis IAEA-s dhe Iranit”, shtoi Grossi. Ai i bëri thirrje vendit që të rishqyrtojë vendimin e tij.
Në vitin 2015, Teherani nënshkroi një marrëveshje bërthamore për të kufizuar në mënyrë drastike pasurimin e uraniumit dhe për të lejuar kontrolle të rrepta të IAEA-s.
Masa kishte për qëllim të kufizonte armët bërthamore në vend.
Pasi Shtetet e Bashkuara të Amerikës u tërhoqën nga marrëveshja në vitin 2018 nën drejtimin e presidentit të atëhershëm Donald Trump, Teherani filloi pasurimin e uraniumit dhe kufizimin e inspektimeve të IAEA-s.
/a.r
