Më shumë se 200 mijë turistë e zgjodhën Gjirokastrën gjatë vitit 2022. Nuk ishin vetëm vizitorë vendas, por edhe të ardhur nga Italia, Çekia, Polonia dhe vende të tjera të Europës. Ecuria e mirë e turizmit në vitin e kaluar ka bërë që të rritet kërkesa për të hapur biznese të reja në qytet. Investimet më të shumta janë përqendruar në pjesën e pazarit karakteristik.
Bizneset janë të sektorëve të ndryshëm. Ata që i kanë hapur rishtazi kanë synim që t’iu shërbejnë sa më mirë turistëve për t’i mikpritur.
“Ne vendosëm të hapnim biznes në Pazar se pamë që kishte lëvizje, qyteti filloi të gjallërohej, qyteti filloi të kishte një ngritje shumë të madhe dhe vendosëm të hapnim një biznes të ri këtu. Bëmë një investim familjar dhe deri më tani kemi ecur mirë”, u shpreh Kujtim Shehu, administrator biznesi.
“2022 ka qenë viti i bizneseve. Edhe lokali që unë menaxhoj është hapur gjatë vitit 2022”, tha Marsel Zani, menaxher lokali.
Investime ka edhe në fushën e hotelerisë. Operatorët turistikë, duke parë rritjen e numrit të turistëve, këtë vit kanë shtuar kapacitetet akomoduese për të pritur vizitorët.
“Kemi parë që ky fluks, Gjirokastrës i mungonin aftësitë akomoduese, ne menduam të zhvilloheshim dhe në vitin 2022 hapëm dhe këtë hotel që është nga mbrapa. Shikojmë që ka kërkesë, kërkesa është në rritje. Qyteti është në zhvillim dhe jemi të kënaqur deri diku”, u shpreh Qazim Tuqi, operator turistik.
Ajo që i tërheq turistët janë edhe punimet me dorë. Artizanë në qytet, të cilët bëjnë punime të tilla thonë se interes ka veçanërisht për veshjet e zonës. Edhe artizanët kanë zgjeruar biznesin e tyre.
“Duke parë se kërkesat janë më të larta dhe për të zgjeruar biznesin kemi krijuar edhe një atelie për kostumet popullore, ku turistët vijnë dhe vishen dhe bëjnë foto në Gjirokastër. Iu pëlqejnë kostumet tona. Kemi krijuar një ambient me produkte antike që turistët i pëlqejnë shumë. Kemi krijuar një dhomë të vogël që turistët të rrinë, të shikojnë pazarin”, tha Vjollca Mezini, artizane.
Në këtë zhvillim të turizmit kanë ndikuar edhe aktivitetet e ndryshme të organizuara nga pushteti lokal.
“Gjatë vitit 2022, por edhe në këto ditë të para të vitit 2023, konstatohet një interes në rritje i subjekteve dhe i administratorëve të bizneseve në pazarin tradicional të Gjirokastrës për të zgjeruar veprimtarinë e tyre. Ndërkohë kjo rritje e interesimit vërehet jo vetëm në zonën historike, por edhe në pjesë të tjera të qytetit të Gjirokastrës”, u shpreh Blerim Kore, drejtor i turizmit në Bashkinë e Gjirokastrës.
Hapja e bizneseve të reja dhe zgjerimi i atyre ekzistues, ka bërë që të ketë më shumë vende pune. Numri i të punësuarve pritet të rritet edhe më shumë gjatë këtij viti.
“Gjatë verës 2022 bizneset, kryesisht baret, restorantet, njësitë e akomodimit krijuan vende të reja pune duke sjellë mundësinë e punësimit të të rinjve. Shpresojmë që edhe gjatë verës 2023 ky zhvillim i turizmit të qëndrueshëm të krijojë çeljen e vendeve të reja të punës kryesisht për të rinjtë”, tha më tej Kore.
Për t’i dhënë më shumë hov turizmit, edhe bashkia e qytetit po përgatit kalendarin e aktiviteteve që do të jenë të larmishme edhe këtë vit.
