Azia mbetet motori kryesor i rritjes në botë, me ekonominë e saj që parashikohet të zgjerohet me 4.5% në vitin 2026, sipas një raporti të publikuar të martën nga Forumi Boao për Azinë (BFA).
Pjesa e Azisë në PBB-në globale parashikohet të vazhdojë trajektoren e saj në rritje, duke u rritur nga 49.2% në vitin 2025 në 49.7% në vitin 2026 në bazë të barazisë së fuqisë blerëse, sipas raportit të titulluar “Raporti Vjetor i Perspektivës Ekonomike Aziatike dhe Progresit të Integrimit 2026”.
Themelet e integrimit tregtar aziatik kanë vazhduar të forcohen, vuri në dukje raporti, duke cituar të dhëna se varësia tregtare brenda rajonit u rrit nga 56.3% në vitin 2023 në 57.2% në vitin 2024, ndërsa ekonomitë kryesore në të gjithë rajonin, i orientojnë gjithnjë e më shumë lidhjet e tyre tregtare drejt njëra-tjetrës.
“Kina dhe ASEAN vazhdojnë të dallohen si ‘spirancat e stabilitetit’ binjak të rajonit”, theksoi raporti.
Ekonomitë e Azi-Paqësorit po kalojnë gjithnjë e më shumë nga integrimi individual në zinxhirët globalë të vlerës, drejt një modeli të integrimit të përbashkët rajonal, me shumë prej tyre që përparojnë në shkallën e zinxhirit të vlerës, të mbështetur nga përkrahja brenda rajonit, tha ai.
Rajoni gjithashtu vazhdon të jetë destinacioni kryesor në botë për investimet e huaja direkte, i njohur për qëndrueshmërinë, potencialin e rritjes dhe tërheqjen e qëndrueshme për investitorët globalë, me Kinën dhe ASEAN që kryesojnë si destinacionet më tërheqëse.
Në frontin e teknologjisë, raporti tha se epiqendra globale e zhvillimit të inteligjencës artificiale, po zhvendoset progresivisht nga Evropa dhe Shtetet e Bashkuara drejt Azisë.
“Duke përfituar nga popullatat e tyre të konsiderueshme dixhitale, nga ekosistemet e larmishme të aplikimeve dhe nga kornizat koherente të politikave, ekonomitë aziatike po evoluojnë me shpejtësi, nga ndjekës të IA-së në pararendës”.
E themeluar në vitin 2001, BFA është një organizatë ndërkombëtare joqeveritare dhe jofitimprurëse, e angazhuar për të promovuar integrimin ekonomik rajonal, si dhe për t’i afruar vendet aziatike me qëllimet e tyre të zhvillimit.
Konferenca e këtij viti, e cila do të zhvillohet nga 24 deri më 27 mars, ka temë “Formësimi i një të ardhmeje të përbashkët: Situatë e re, Mundësi të reja, Bashkëpunim i ri”.
