Ish shefi i SHIK-ut, Fatos Klosi, i përgjigjet në këtë intervistë për ‘DITA’-n sulmit të ish-kryeministrit Berisha. “Sa për emërimin tim, ai e ka kundërshtuar një propozim të prillit 1997 dhe gjer në korrik, që iku nga Presidenca, e kishte të gjithë kohën e nevojshme për ta marrë atë “dosje” sa herë të donte dhe ka patur plot raste për ta treguar. Berisha di vetëm të shpifë, për të politika është vetëm shpifje pa fund. Interesante është se zakonisht akuzat, janë huazuar nga bëma që i ka kryer vetë – thotë ish kreu i SHISH.
– Zoti Klosi, ditët e fundit jeni akuzuar nga kryeministri i Kosovës, Isa Mustafa, si dhe nga ish-kryeministri i Shqipërisë Sali Berishase i keni shërbyer Serbisë’ për çështjen e Kosovës. Si do t’u përgjigjeshit akuzave të tyre?
– Këto akuza më kujtojnë situatën kur hajduti thotë: kapeni hajdutin. Me këtë që them nuk dua t’ ua kthej me të njëjtën monedhë, nuk kam ndërmend t’i quaj “spiunë”, sepse për mua kjo fjalë nuk ka kuptimin e një etiketimi, është thjesht një sharje e pastër. Por një gjë dua t’ua këshilloj të dyve, për luftën çlirimtare të popullit të Kosovës, që të dy nuk kanë gojë të flasin, gjatë gjithë asaj periudhe kanë qenë në bisht të situatës, bile dhe më keq. Duke u përpjekur për të ndihmuar luftën që shkëputi përfundimisht Kosovën nga Serbia, nuk më duket se i kam shërbyer Serbisë. Nëse atyre iu vjen keq për këtë shkëputje që ka ndodhur, është puna e tyre.
– Berisha shkruante dje se “Emërimi i tij (pra i juaji) pas vitit 1997 në krye të Shërbimit Informativ Kombëtar, është bërë në kundërshtim flagrant dhe pasi është zhdukur dosja e tij disa vjeçare”. E thotë një ish-President dhe një ish-Kryeministër…
– Sa për emërimin tim, ai e ka kundërshtuar një propozim të prillit 1997 dhe gjer në korrik, që iku nga Presidenca, e kishte të gjithë kohën e nevojshme për ta marrë atë “dosje” sa herë të donte dhe ka patur plot raste për ta treguar. Berisha di vetëm të shpifë, për të politika është vetëm shpifje pa fund. Interesante është se zakonisht akuzat, janë huazuar nga bëma që i ka kryer vetë. Në komisionin hetimor parlamentar të vitit 2002, më akuzoi për të gjitha krimet e kësaj bote. Pasi ndenji 8 vjet në pushtet, tani i kërkon kosovarëve që të hapin një hetim për mua. A nuk është për të ardhur keq që e kemi patur President dhe Kryeministër një karagjoz të tillë?
– Shpesh është folur për një dosje të Berishës ndaj shërbimeve të huaja. A ekziston një dosje e tillë?
– Dosja më e rëndë për të janë të bëmat e tij, janë të gjitha ato probleme që ai ka krijuar në Shqipëri sa herë Serbia kishte probleme në Kosovë; është një dosje e hapur që në hapat e para të Presidencës së tij. Historia do t’i japë me siguri vendin që meriton.
Marrë nga Dita
