Një intervistë e ndërprerë disa herë. Gëzim Reçi, kolegu dhe miku i ngushtë i efektivit të vrarë të Forcave të Ndërhyrjes së Shpejtë, Ardian Kodra, s’i mbante dot lotët e as i fshihte dridhjet e zërit gjatë rrëfimit për ditën e djeshme, kur Suardi, djali i ish efektivit i kërkoi ta shoqëronte në ditën e parë të shkollës.
“Më falni…më falni…”, përsërit disa herë gjatë intervistës Gëzimi duke më thënë se duhet ta kuptoj sa i emocionuar është dhe sesa e fortë është për të të dijë se babai i Suardit, “shoku i jetës”, siç e quan ai, nuk jeton më.
Por pavarësisht ndërprerjeve, nga mënyra sesi Gëzimi më flet për shokun e tij të jetës dhe djalin e tij Suardin, kuptoj që janë gjëra që do t’i ndajë pas gjithë atyre emocioneve që iu desh t’i barte ditën e djeshme. Madje kur flet për 15 vjeçarin Suard, ai do të ndalë e t’i japë rëndësi çdo momenti me të.
“Kam ndjerë shumë dhimbje. Ishte shumë e fortë për mua të shoqëroja në ditën e parë të shkollës djalin e shokut tim duke ditur që i ati nuk jeton më”, thotë kolegu i të ndjerit Kodra.
“Shpërtheu në lot pasi pa të gjithë shokët e babit teksa e prisnin. Aty shpërtheva edhe unë. Isha shumë i emocionuar. Një skenë e fortë ishte edhe kur Tahiri u afrua pranë tij dhe i vuri dorën në supe…”, rrëfen më tej Gëzimi duke zbuluar edhe dialogun mes ministrit dhe të riut Suard.
INTERVISTA:
Suardi ju kërkoi dje ta shoqëronit në ditën e parë të shkollës… Çfarë marrëdhënie keni me të, pse donte të ishit pikërisht ju pranë tij në një ditë aq të rëndësishme?
Kemi një marrëdhënie të jashtëzakonshme. Unë babain e Suardit, Ardianin që u vra në krye të detyrës, e kam patur shok jete. Djali i tij, tashmë është edhe shoku im.
Çfarë ndjetë kur Suardi ju kërkoi ta shoqëronit?
Të them realitetin…kam ndjerë shumë dhimbje. Ishte shumë e fortë për mua të shoqëroja në ditën e parë të shkollës djalin e shokut tim duke ditur që i ati nuk jeton më. Por pastaj e mblodha veten dhe ashtu mes emocionesh vendosa ta shoqëroja.
Ishit ju ai i cili njoftuat ministrin e Brendshëm Saimir Tahiri mbi faktin që Suardi ju kishte kërkuar ta shoqëronit në shkollë?
Jo, jo. Që në momentin që ministri Tahiri mori vesh vrasjen e Ardianit ka ardhur në Shkodër dhe u gjend pranë nesh e familjes së mikut tim.
Ministri ishte edhe në varrim dhe, duke ditur që unë isha miku i ngushtë i Ardianit, mbajti kontakte me mua dhe u gjend në ceremoninë surprizë duke i bërë edhe atë dhuratë, lap-top-in që i kishte premtuar i ati.
E shoqëruat djaloshin nga shtëpia në shkollë. Çfarë ju tha gjatë rrugës?
Ishte një emocion i papërshkrueshëm, Ishim në këmbë bashkë… Gjatë rrugës po më fliste për ditën e parë të shkollës për klasën, shokët, mësuesit…. Pastaj më foli për babain dhe dëshirën që ai kishte për Suardin, që ta regjistronte në atletikë në një shkollë në Durrës. I ati donte që Suardi të vazhdonte një shkollë sportive por pastaj për shkak të rrethanave por edhe zgjedhjes së djalit, nuk e regjistruan.
Shkuat në oborr. Aty ishin të gjithë kolegët tuaj, ministri Tahiri, mësueset, nxënësit duke ju parë teksa hynit. Si u ndje Suardi në gjithë këtë?
Aty shpërtheu në lot pasi pa të gjithë shokët e babit teksa e prisnin. Aty shpërtheva edhe unë. Isha shumë i emocionuar.
Një skenë e fortë ishte edhe kur Tahiri u afrua pranë tij dhe i vuri dorën në supe.
“Uaaaaaa ministri” tha Suardi. Nuk e besonte që edhe Tahiri ishte aty për të.
E nderuam të gjithë kolegët sikur të ishte vetë Ardiani gjallë…
Ju ishit aty kur Tahiri u takua me Suardin… Çfarë folën ata?
Teksa ministri po e shoqëronte te shkallët, i hodhi krahun dhe iu drejtua me fjalët: “Suard, ti je me ne, ne me ty. Fryma jote do të jetë e jona dhe do jemi pranë teje sa herë të kesh nevojë ti dhe familja jote”.
I emocionuar, i përlotur por edhe i druajtur, Suardi mundi vetëm t’i thoshte “Falemindeit ministër”.
Po kur mbaroi e gjithë ceremonia? Cilat ishin përjetimet e djalit?
Aty kishte emocione që s’i përshkruaj dot. S’i mbante dot më lotët.
Ne patëm bashkë edhe një takim pas shkolle dhe ai më tha se ishte ndjerë shumë krenar për të atin dhe se kishte ngelur i habitur, i shtangur nga ajo që ndodhi në shkollë.
“Nuk po e kuptoja çfarë ndodhi”, më tha. Suardi është djali i shokut tim të jetës. Unë do përpiqem çdo ditë t’ia bëj sa më të lehtë…/*Nga Anta Muçaku për newsbomb.al
