Nuk ka qenë asnjëherë kaq lirë për të marrë një kredi në lekë. Interesi mesatar i huasë së re në lekë në muajin nëntor zbriti në 7.4%, sipas statistikave të Bankës së Shqipërisë, nga gati 8% që ishte muajin e mëparshëm. Ky është niveli më i ulët historik i kostos së kredisë në lekë.
Që prej shtatorit të vitit 2011, Banka e Shqipërisë ka ndjekur një politikë të lehtësimit monetare, duke ulur normën bazë 14 herë, nga 5.25% në 1.75% aktualisht. Ndonëse me vonesë, kjo politikë është rflektuar në reduktimin e interesave që kreditorët duhet t’i paguajnë bankat për huatë që ata marrin (në shtator 2011, interesi mesatar i kredive në lekë ishte 11.1%).
Në krahasim me janarin e këtij viti, norma e interesit është ulur me 0.7 pikë përqindje.
Megjithatë ulja e normës së interesit nuk ka dhënë efekt në nxitjen e kreditimit, që ka qenë shumë i dobët këtë vit. Statistikat tregojnë se gjatë 2015-s kreditimi i ekonomisë është futur në ngërç. Me bazë vjetore (nëntor 2015/nëntor 2014) stoku i huasë për ekonominë është reduktuar me 2.2%, apo me rreth 12.3 miliardë lekë dhe e gjithë rënia ka ardhur nga bizneset private.( Lexo: Nentor, tkurret kredia per bizneset, rritet per kompanite shteterore).
Përveç normave të interesit, faktorë të tjerë po ndikojnë në financimin e bizneseve e kosnumatorëve, si kërkesa e dobët për investime në ekonomi dhe kujdesi i shtuar të bankave në kredidhënie, teksa huatë me probleme nuk po arrijnë të zbresin nën 20%. Këtyre u shtohen dhe ngadalësimi i rritjes ekonomike, pasiguria dhe stepja e bizneseve për të investuar.
