Vlora ka nisur të mirëpresë vizitorët e parë të këtij sezoni, kryesisht grupe turistësh të moshës së tretë nga vende të ndryshme të botës.
Krahas bukurive natyrore, kjo periudhë para sezonit turistik karakterizohet nga çmime më të ulëta dhe temperatura më të përshtatshme për moshat e mëdha, duke e bërë qytetin bregdetar një zgjedhje të preferuar për këta vizitorë.
Turistët vijnë nga vende si Izraeli, Italia, Gjermania, por nuk mungojnë edhe ata nga Afrika apo nga shtete të Lindjes së Mesme ndërsa interesi i tyre lidhet me historinë dhe kulturën e qytetit.
“Jam nga Izraeli dhe më pëlqen shumë Vlora, njerëzit dhe atmosfera e qytetit. Dielli, mikpritja dhe veçanërisht Manastiri i Zvërnecit më kanë lënë mbresa. Ndoshta nuk jam e sigurt nëse do të rikthehem, por me siguri do ta rekomandoj Vlorën si destinacion”, thotë një turiste.
“Së pari, plazhet janë shumë të bukura, pamjet janë të mrekullueshme dhe ushqimi është fantastik. Besoj se do të rikthehem. Shqipëria është e bukur dhe do të zhvillohet akoma më shumë. Vlora më pëlqen për atmosferën dhe qetësinë që ofron”, shprehet një turist.
Operatorët turistikë raportojnë një rritje të ndjeshme të kërkesave dhe rezervimeve, jo vetëm në njësitë hoteliere, por edhe në apartamentet që jepen me qira ditore, krahasuar me të njëjtën periudhë të vitit të kaluar.
Kjo tendencë jep sinjalet për një sezon turistik premtues për qytetin bregdetar ku duket se Vlora është kthyer si destinacioni i preferuar i turistëve të moshës së tretë nga vende të ndryshme të botës të cilët janë të interesuar kryesisht për historinë dhe kulturën e qytetit.
