Mauro Icardi nuk ka më vend tek Interi dhe drejtori sportiv Beppe Marotta është në kërkim të një zëvendësuesi. I përzgjedhuri është belgu Romelu Lukaku, i cili luan me Manchester United në Premier League dhe kushton rreth 65-70 milionë euro.

Për të siguruar blerjen e tij pa shpenzuar këtë shumë, Inter është gati të negociojë me “djajtë” për të gjetur një rrugë të mesme. Sipas “tutomercatoweb”, Marotta ka bërë ofertën e parë zyrtare: 30 milionë euro si dhe kartonin e mesfushorit kroat Ivan Perisic (vlen rreth 35 milionë euro).

Perisic është një lojtar që Manchester United e ka kërkuar me ngulm verën e kaluar, por asokohe skuadra britanike drejtohej nga Jose Mourinho, që nuk është më. Ndaj, zikaltërit janë gati të ofrojnë lojtarin dhe një shumë para për të marrë Lukakun, kandidati kryesor për sulmin.

Kjo ofertë ndodhet në tryezën e menaxherit të Manchester United, Ed Woodward, që ende nuk ka vendosur nëse do të pranojë apo jo. Lukaku duket se do të largohet nga “Old Trafford” këtë verë, por United përpiqet të maksimizojë fitimin nga shitja e tij.

Nga ana tjetër, Lukaku do të nënshkruajë një kontratë 4-vjeçare, nga e cila do të përfitojë 7.5 milionë euro në sezon. (Tema)