Këshilli Kombëtar për Integrimit Europian zhvilloi këtë të martë një mbledhje. Kryetarja Jorida Tabaku u shpreh se duhet vullnet politik që puna të përkthehet në angazhime konkrete. Ajo u shpreh se nuk duhet të fshihemi pas vetos së Bullgarisë, por duhet të bëhet puna këtu dhe të ecet përpara pavarësisht datës që mund të jepet për integrimin.
Jorida Tabaku: Unë ju inkurajoj këdo që është i përfshirë në këtë proces që të ulemi dhe të gjejmë një mënyrë që metodologjinë e re ta kthejmë në avantazh për institucionet dhe për procesin e integrimit. Do të kisha dëshirë të fokusohemi edhe tek pushteti lokal. Nga informacionet që kemi dhe raportimet që na kanë ardhur në shumë prej bashkive nuk janë ngritur njësitë e integrimit. Stafi ka ndryshuar gjatë vitit 2020. Kështu ndodh edhe në strukturat në ministri. Jam përpjekur gjatë gjithë kohës t’i ngre këto dyshime. Për këtë arsye unë gjithë kohës jam përpjekur t’i ngre këto shqetësime, që disa mund të duken teknike, disa politike, por të gjitha kanë emëruesin e përbashkët: Vullnet politik. Vullnet politik që për herë të parë ndryshe edhe nga koha kur keni qeverisur ju e keni edhe nga opozita. Ky vullnet politik duhet përkthyer në angazhime konkrete dhe punë konkrete. Ne nuk mund të fshihemi pas vetos së Bullgarisë, nuk mund të fshihemi as pas proceseve që janë jashtë dorës sonë duhet të bëjmë punën tonë këtu, të ecim përpara dhe pavarësisht një date që ndoshta nuk është në dorën tonë.
Ndërkohë Taulant Balla u shpreh se Shqipëria nuk fshihet pas vetos së Bullgarisë pasi kjo e fundit e ka shprehur qëndrimin e saj që me Shqipërinë nuk ka asgjë.
Taulant Balla: Besoj që është koha që ta shohim këtë proces me pozitivitet edhe pse nuk është në dorën tonë ngecja e procesit të zgjerimit, edhe për shkaqe që ndoshta më përpara nuk kanë ekzistuar, sepse edhe në raste më parë nuk ka pasur anëtarë të BE që të kenë vendosur veton për anëtarësimin e një vendi apo grupi vendesh. Ne nuk fshihemi pas vetos së Bullgarisë sepse Bullgaria e ka bërë të qartë që nuk ka gjë me Shqipërinë, por ka një çështje bilaterale me Maqedoninë e Veriut dhe besoj që dy qeveritë e reja të tejkalojnë shpirtrat ballkanikë dhe të sillen si europianë për të zgjidhur këtë situatë. Nuk dua kurrsesi të replikoj. Për mua ka rëndësi që Këshill Kombëtar i Integrimit të flasë në një zë në lidhje me axhendën integruese.
Ministrja Xhaçka theksoi se arritjet e vendit tonë janë pranuar në mënyrë unanime nga 27 vende të BE dhe se Shqipëria vijon të mbetet një dëm kolateral i mosmarrëveshjes Bullgari-RMV.
Olta Xhaçka: Qeveria shqiptare ka vazhduar me përkushtim dhe dedikim zbatimin e programit ambicioz të reformave gjithëpërfshirëse, duke përmbushur të gjitha kërkesat nga Këshilli për mbajtjen e Konferencës së parë Ndërqeveritare. Kjo do të thotë se i kemi kryer të gjitha “detyrat e shtëpisë” në reformën zgjedhore, reformën në drejtësi, luftën kundër krimit të organizuar dhe korrupsionit, reformat në lidhje me respektimin e të drejtave dhe lirive themelore, etj. Kushtet janë plotësuar dhe kjo u pranua dhe u vlerësua nga raporti i Komisionit, në tetor 2021, dhe po ashtu nga të gjitha vendet anëtare. Në këtë mënyrë, e kemi dëshmuar veten si një partner i besueshëm i BE-së.
Kryediplomatja shqiptare nënvizoi se Shqipëria do vazhdojë t’i ofrojë mbështetjen e saj të plotë BE-së, edhe përgjatë mandatit si anëtare jo e përhershme e Këshillit të Sigurimit të OKB-së për periudhën 2022-2023.
/a.r
