Departamenti i Administratës Publike dhe Shkolla Shqiptare e Administratës Publike me mbështetjen e Projektit të Binjakëzimit IPA “Mbështetje për reformën e shërbimit civil në Shqipëri”, kanë nisur sot një cikël trajnimesh për nëpunësit e Administratës Publike që do të angazhohen në procesin e negociatave.
Ministrja për Inovacionin dhe Administratën Publike, Milena Harito dhe ministrja e Integrimit Europian, Klajda Gjosha kanë përshëndetur pjesëmarrësit në këtë trajnim.
“Ju jeni dallëndyshet e para të këtij procesi dhe unë dua t’ju përshëndes me shumë kënaqësi sepse nga ju fillon puna e gjatë edhe e vështirë për gjithë negociatat, që janë një proces i gjatë, kompleks, i vështirë që kërkon shumë kapacitete dhe aftësi”, tha ministrja Harito në fjalën e saj.
Duke theksuar reformat e ndërmarra nga qeveria shqiptare Harito është shprehur: “Ne kemi ndërmarrë gjithë reformat e nevojshme që administrata të jetë e qëndrueshme dhe ju jeni pjesë e kësaj administrate të qëndrueshme, me një sistem rekrutimi transparent dhe një sistem karriere motivues. Sot ju jeni pjesë e kësaj administrate, por në fund të këtij procesi ju të gjithë do të jeni pjesë e administratës së një vendi të BE”.
Nga ana e saj ministrja e Integrimit Europian tha: “Dua të theksoj se jemi plotësisht të ndërgjegjshëm se angazhimi ynë për të avancuar me reformat, si dhe serioziteti me të cilin do të përballohet çdo fazë e procesit, do të përcaktojnë ritmin e rrugëtimit tonë drejt integrimit në BE”.
Në këtë kuadër Gjosha theksoi se përgatitja e administratës publike merr një rëndësi prioritare.
“Forcimi i kapaciteteve profesionale është pjesë integrale e dhe e qenësishme e politikave të Ministrisë së Integrimit Europian, sepse jemi të bindur që vetëm kështu do të arrijmë të përballojmë me sukses të gjitha fazat pasuese të procesit të anëtarësimit”, tha Ministrja.
Trajnimi i nëpunësve të administratës do të drejtohet nga 3 ekspertë ndërkombëtarë, 2 kroatë dhe 1 francez, me një eksperiencë të gjerë në fushën e procesit të negociatave të anëtarësimit në Bashkimin Evropian.
Qëllimi kryesor i trajnimit do të jetë përmirësimin e njohurive dhe aftësive të nëpunësve mbi procesin e negociatave me institucionet e Bashkimit Evropian si dhe rritja e kapaciteteve administrative të nevojshme për koordinimin e procesit të negociatave.
Grupi i nëpunësve që marrin pjesë në këtë trajnim përbëhet nga përfaqësues të institucioneve të ndryshme, përgjegjës për kapitujt përkatës, të evidentuar nga vetë institucionet dhe Ministria e Integrimit Evropian.
