Në muajin korrik eksportet e mallrave arritën vlerën e 22 miliard lekëve, duke u ulur me 0,6 % në krahasim me korrikun e 2015-ës dhe me 0,9 % në krahasim me qershorin e 2016-ës.
Sipas raportit mbi tregtinë e jashtme të publikuar nga Instituti i Statistikave, importet e mallrave në muajin korrik 2016 arritën vlerën 50 miliard lekë, duke u ulur me 5,0 % në krahasim me korrikun e 2015-ës dhe me 4,3 % në krahasim me qershorin e 2016-ës.
Defiçiti tregtar i këtij muaji është 27 miliard lekë, duke u ulur me 8,3 % krahasuar me korrikun e 2015-ës dhe me 6,9 % në krahasim me qershorin e 2016-ës.
Ndikimi i grupeve kryesore në ndryshimin vjetor të eksporteve
Rënia vjetore e eksporteve prej 0,6 % këtë muaj është ndikuar kryesisht nga grupet “minerale, lëndë djegëse, energji elektrike” me -5,8 pikë përqindje, “materiale ndërtimi dhe metale” me -0,9 pikë përqindje, “prodhime druri dhe letre” me -0,6 pikë përqindje. Në ndryshimin vjetor të eksporteve kanë ndikuar pozitivisht grupet “tekstile dhe këpucë” me +6,1 pikë përqindje, “makineri, pajisje dhe pjesë këmbimi” kanë kontribuar me +0,5 pikë përqindje, “produkte kimike dhe plastike” me +0,2 pikë përqindje.
Ndikimi i grupeve kryesore në ndryshimin vjetor të importeve
Rënia vjetore e importeve prej 5,0 % këtë muaj është ndikuar kryesisht nga grupet “materiale ndërtimi dhe metale” me -4,8 pikë përqindje, “minerale, lëndë djegëse, energji elektrike” me -2,9 pikë përqindje, “lëkurë dhe artikuj prej tyre” me -0,03 pikë përqindje. Në ndryshimin vjetor të importeve ka ndikuar pozitivisht grupi “tekstile dhe këpucë” me +1,0 pikë përqindje”, “makineri, pajisje dhe pjesë këmbimi” me +0,9 pikë përqindje, “ushqim, pije, duhan” me +0,7 pikë përqindje. /r.a
