Filmimet e kamerave të sigurisë çuan në pranga një infermiere të një qendre vaksinimi në Palermo, javën e kaluar. Policia italiane publikoi pamjet që tregojnë momentet kur 58-vjeçarja Xhorxha Kamarda shtirej sikur u injektonte vaksinat, personave që shkonin në qendrën e vaksinimit ku ajo shërbente, duke u dhënë atyre certifikatë false në këmbim të parave.
Për të mos tërhequr vëmendjen e mbikqyrësve të kamerave të sigurisë, ajo e afronte shiringën pranë krahut të personave që paraqiteshin për t’u vaksinuar, por përmbajtjen e dozave e injektonte jo në krahun e tyre por në një garzë që e përdorte për të mbuluar aktin.
Hetuesit zbuluan të paktën 11 persona që kishin përfituar certifikata false prej 58-vjeçares përfshirë edhe liderin e një grupi aktivistësh kundër vaksinimit. 58-vjeçarja ndodhet aktualisht në arrest shtëpie. Muajin e kaluar, bëri bujë edhe rasti i një kolegeje të saj në të njëjtën qendër që u ndalua për falsifikim të certifikatave të vaksinimit. Fenomeni, megjithatë është i përhapur në gjithë Europën.
/a.r
