Inxhinieri Arben Meçe ishte sot i ftuar në emisionin Shqip në DritareTv. Meçe foli për nismën e Parlamentit për shkarkimin e presidentit Ilir Meta.

Për Meçen ky është vendim i drejtë, pasi sipas tij Meta ka kryer dy shkelje të rënda kushtetuese, njëra u bë palë më 25 prill dhe e dyta cenoi marrëdhëniet me ndërkombëtarët.

Meçe u shpreh se fakti që Meta nuk dha dorëheqje edhe pse e premtoi, nuk është punë mungese kuraje, por burrërie dhe personaliteti.

Ia vlen te theksojme se Arben Meçe si pedagog dhe Ilir Meta si student, ne vitin 1990 kane qene me grupin e studenteve ne takim me Ramiz Aline, pas te cilit u shpall pluralizmi politik!

Arben Meçe: Presidenti i Republikës së Shqipërisë si në themel shpeshherë themi se ligji lexohet germë për germë por edhe në parim, në frymë.

Fryma e zgjedhjes së presidentit është një dhe e vetme. Dhe ajo që karakterizon në Kushtetutë presidentin është figura e unitetit të popullit. Ai nuk mund të bëhet palë në asnjë rast.

Në momentin kur ai bëhet palë prek frymën e një institucioni që quhet Kushtetutë. Që nga ky moment shkelja e frymës quhet shkelje ligjore. E them me bindje të plotë se, praktikisht nuk jam përfaqësuar nga ky president në kuadër të frymës.

Kur them unë, nuk nënkuptoj veten tim, por mbi 50% të shqiptarëve që votuan më 25 prill, të cilët mbajtën një qëndrim pro PS-së.

Gjithë ky 50% nuk është përfaqësuar nga presidenti i Republikës, sepse presidenti doli palë, duke cenuar parimin kushtetues mbi të cilin u zgjodh. Parlamenti zgjedh presidentin, por ka dhe një dispozitë në bazë të Kushtetutës, i cili ka të drejtën ligjore për të shkarkuar atë. Dhe neni 90 parashikon shkarkimin e presidentit. Pra nisma e Parlamentit për shkarkimin e Metës është tërësisht ligjore, kushtetuese.

Presidenti shkarkohet për dy raste, shkelje të rëndë të Kushtetues dhe kryerje të një krimi të rëndë. Të dyja këto raste gjykohen nga Parlamenti me një vendimmarrje nëpërmjet Komisionit Hetimor, i cili jodomosdoshmërish është juridik. Juristët janë juridikë, por Parlamenti është institucion politik.

Prandaj ligjvënësi ka parashikuar që nëse Parlamenti bën gabim juridik, që është normale ta bëjë, sepse ka prirje politike, vetë Kushtetuta ngarkon që analizë juridike të një vendimmarrje politike që Parlamenti ia kalon Gjykatës Kushtetuese.

E gjithë sipërmarrja e Parlamentit është vendim politik. Unë besoj se nga ky vendim politik do të dalë dhe një vendimmarrje për shkarkimin e presidentit.

Për mua plotëson të gjitha kushtet dhe kriteret për t’u shkarkuar sepse ka shumë elementë të shkeljes së Kushtetutës nga ana e presidentit sot. Unë thashë një shkelje, por ka dhe të tjera.

Cenimi i marrëdhënieve me partnerët ndërkombëtarë strategjikë është e dyta shkelje. Pra për mua Meta duhet të kishte dhënë dorëheqje dhe t’i hapte rrugë procesit.

Për mua kjo nuk është punë kuraje, por burrërie dhe personaliteti. Nuk e di kë ka këshilltar ligjor Meta, por nuk ka asnjëlloj aleance që ta mbështesë në këtë sipërmarrje.