Drejtoresha e Përgjithshme e Tatimeve, Delina Ibrahimaj, u shpreh se, në kuadër të aksionit kundër informalitetit deri tani janë kontrolluar 3440 subjekte, prej të cilëve 1487 kanë rezultuar me shkelje të ndryshme.
“Janë kryer rreth 50 mijë vizita në Shqipëri, me qëllim sensibilizimi para se të fillonim planin e kontrollit. Aktualisht jemi shtrirë në gjithë bregdetin, në bar-biznese, hoteleri-turizmit. Kemi konstatuar shkelje të ndryshme, regjistrim subjekti, faturë, sigurimi i punonjësve. Kemi konstatuar shkelje të të gjitha llojeve. Numri më i madh i shkeljeve ka qenë për moslëshim të kuponit tatimor, ku subjektet janë bllokuar”, – tha Ibrahimaj në një intervistë televizive.
Sipas saj, qëllimi kryesor është që ata biznese që paguajnë të gjitha taksat e detyrimet të punojnë në kushtet e një konkurrence të rregullt. Ndërsa theksoi se, plani operacional do vijojë me kontrollin e karburanteve dhe subjekteve të ndërtimit.
“Deri në mes të muajit shtatorit, kontrolli do jetë i përqendruar te turizmi dhe më pas do vijojë aty ku ka më shumë informalitet, karburantet dhe ndërtimi, disa janë biznese VIP-a, disa janë të mëdhenj, dhe aty janë humbjet më të mëdha”, – tha ajo.
Ibrahimaj shpjegoi se, përmes procesit të fiskalizimit synojmë që i gjithë sistemi të funksionojë me fatura elektronike, që do transmetohen në kohë reale pranë Drejtorisë së Përgjithshme të Tatimeve. Projekti ka fazën e parë, nga biznesi drejtuar konsumatorit, e dyta implikon biznesin me biznesin, që nuk do komunikojnë më me fatura me letër, por me fatura elektronike, që do jetë një mjet që do përdoret dhe nga bankat.
“Kjo do na lejojë që produkti të ndiqet nga prodhimi, deri te konsumatori. Kjo do shmangë një pjesë të madhe të terrenit, pasi pjesa më e madhe e kontrolleve do të bëhet nga zyra. Fiskalizimi është një revolucion, sesi administrata dhe biznesi do të funksionojnë. E kemi parashikuar që faza e parë të nisë më 1 janar 2020, ndërsa faza e dytë vitin e ardhshëm. Faza e tretë është biznes me shtet”, – deklaroi Ibrahimaj.
Ajo u shpreh se administrata tatimore po trajnohet për mënyrën e re të kontrollit. Trajnimet do të përfundojnë brenda këtij viti. Ndërsa për bizneset, kemi hapur një link të veçantë për fiskalizimin, ku ata mund të drejtojnë pyetje për informim.
Drejtoresha e Tatimeve tha se, faturimi elektronik, patjetër që do të ketë kosto. Koston do ta vlerësojë tregu dhe konsumatorët. Bizneset do duhet të blejnë softwer dhe një kasë, që ka kosto të ulët.
/a.r
