Pas reshjeve të dendura që kanë shkaktuar përmbytje në disa zona të vendit, Kryeministri Edi Rama ka publikuar pamje nga puna në terren të njësive operative gjatë natës, duke treguar përpjekjet e vazhdueshme për menaxhimin e situatës emergjente.
Kryeministri Edi Rama ka bërë me dije se gjatë natës, të gjitha njësitë operative, ekipet e bashkive, Emergjencat Civile lokale, Forcat e Armatosura, ekipet mjekësore dhe Policia kanë qenë në gatishmëri për të menaxhuar situatën emergjente pas reshjeve dhe përmbytjeve.
Ai njoftoi se gjatë natës kanë vazhduar reshjet e shiut dhe ka filluar të bjerë dëbora në zonat veriore dhe juglindore të vendit.
Reshje dëbore janë regjistruar në: Rajoni verior: Bajram Curri-Valbonë, Ura Bujan-Qafë Morinë, Bujan-Qafë Morinë (doganë), Sopot-Kerrnaj, Qafe Mejdan-Tropojë-Buçaj Bulqizë, Qafë Bualli-Peshkopi, Peshkopi-Maqellarë, Hani i Hotit-Dogana Vermosh, Kukës-Shishtavec, Kukës-Bushtricë, Bajram Curri-Valbonë, Pukë-Fushë Arrëz, Bogë-Theth dhe Qafë Mali-Fushë Dukagjin; Rajoni Qendror: Surrel-Qafë Priskë-Qafë Mollë, Elbasan-Gjinar, Ibë-Kërrabë-Elbasan.
Rajoni Jugor: Llogara, Qafë Thanë, Korçë-Voskopojë, Boboshticë-Dardhë, Korçë-Ersekë, Ersekë-Leskovikë.
Kryeministri ka bërë me dije se kontraktorët dhe punëtorët janë në terren pa ndërprerje 24/7 për pastrimin e akseve rrugore, ndërsa qytetarëve u kërkohet të shmangin udhëtimet jo të domosdoshme dhe të përdorin goma dimërore në zonat ku ka dëborë dhe ngrica.
Ai gjithashtu nënvizoi rëndësinë e koordinimit të institucioneve shtetërore dhe bashkëpunimit të qytetarëve për të garantuar sigurinë e të gjithëve.
