Sipas të dhënave më të fundit të publikuara nga Instituti i Statistikave (INSTAT), inflacioni i matur me Indeksin e Harmonizuar të Çmimeve të Konsumit (IHÇK) ka arritur në 3,2% në muajin Qershor 2026. Ky tregues reflekton ecurinë e çmimeve me pakicë brenda territorit shqiptar dhe shërben si instrumenti kryesor për monitorimin e stabilitetit të çmimeve në raport me standardet evropiane.
Grupet që udhëhoqën rritjen vjetore
Rritja e çmimeve gjatë këtij muaji është udhëhequr kryesisht nga kostot e përditshme të jetesës dhe sektori i shërbimeve. Grupi “Ushqime dhe pije joalkoolike” vijon të mbajë peshën kryesore në buxhetin e familjeve shqiptare, duke dhënë ndikimin më të madh në këtë shtrenjtim.
Sipas raportit të INSTAT, rritja vjetore u ndikua nga këta sektorë kryesorë:
“Kontributin kryesor në rritjen vjetore të çmimeve në muajin Qershor e dha grupi ‘Ushqime dhe pije joalkoolike’ me +1,02 pikë përqindje (rritje vjetore 2,9%), pasuar nga grupi ‘Argëtim, sport dhe kulturë’ me +0,65 pikë përqindje (rritje vjetore 10,2%) dhe ‘Restorante dhe shërbime akomodimi’ me +0,56 pikë përqindje (rritje vjetore 3,9%).”
Sektorët e tjerë që patën ndikim pozitiv në rritjen vjetore përfshijnë pije alkoolike dhe duhan: +0,25 pikë përqindje (Rritje vjetore: 4,9%); transporti +0,16 pikë përqindje (rritje vjetore: 1,9%); shërbimi arsimor +0,15 pikë përqindje (rritje vjetore: 3,3%).
Ndryshimet mujore, transporti dhe ushqimet pësojnë rënie të lehtë
Ndryshe nga tendenca vjetore, çmimet e konsumit në muajin Qershor 2026 shënuan një rënie të lehtë prej 0,1% e krahasuar kjo me muajin e mëparshëm (Maj 2026). Ky ngadalësim mujor erdhi kryesisht si pasojë e lirimit të kostove të udhëtimit dhe disa artikujve të shportës bazë.
Rënia mujore u ndikua nga këto grupe: Transporti, rënie prej 2,1%; qira, ujë, energji, gaz dhe karburante rënie prej 0,8%; ushqime dhe pije joalkoolike, veshje dhe këpucë rënie prej 0,5% secili.
Nga ana tjetër, presioni rritës mujor u regjistrua sërish tek grupi “Argëtim, sport dhe kulturë”, i cili u shtrenjtua me 3,2% brenda një muaji, i ndjekur nga shërbimet e arsimit (+0,7%) dhe shëndetësia (+0,5%).
Risitë metodologjike dhe harmonizimi me BE-në
INSTAT sqaron se duke filluar nga kjo periudhë, të dhënat pasqyrohen sipas klasifikimit të ri ndërkombëtar ECOICOP 2018 (Versioni 2), në përputhje me Rregulloren e Bashkimit Evropian. Ky kalim ka sjellë një ristrukturim të shportës zyrtare, e cila tashmë përbëhet nga 410 produkte dhe shërbime, si dhe ka zhvendosur periudhën bazë të referencës së indeksit në vitin 2025 = 100. Ndonëse peshat e mallrave janë përditësuar mbi bazën e Llogarive Kombëtare, instituti garanton se normat historike të inflacionit të përgjithshëm mbeten të pandryshuara.
