Në Indi ka filluar puna për ndërtimin e qiellgërvishtëses më të lartë fetare në botë në Uttar Pradesh. Bëhet fjalë për një kullë- tempull rreth 215 metra e lartë, e cila i dedikohet perëndisë hinduiste Krisshna.
Tempulli hinduist qiellgërvishtës quhet “Vrindavan Chandrodaya Mandir”, që do të thotë “Hëna në ngritje e Vrindavanit”. Sipas liturgjisë hinduiste Vrindavani është vendi ku perëndia Krishna është rritur. Tempulli “Hëna në ngritje e Vrindavanit” është projektuar si një ndërtesë 70 katëshe që i reziston tërmetit dhe do të rrethohet nga një pyll me shtrirje 30 hektarë.
Themelet e kësaj kulle do të jenë rreth 55 metra të thella. Nga muaji mars i viti 2017, pritet që të kenë përfunduar 511 kolonat mbajtëse të themeleve. Kulla fetare, që i ngjan një anije kozmike, pasi të jetë ndërtuar do të mund të përshkohet në lartësinë e saj me anë të një ashensori në formë kapsule.
Ndërsa ngjiten në lartësinë e kullës, vizitorët do të kenë mundësi të njihen me sistemin planetar dhe gjithësinë, siç është përshkruar në letërsinë e mijëra viteve më parë të Vedave. Ndërkaq, në periferi të “Hënës në ngritje të Vrindavanit”, do të ketë ndërtesa dhe vila banimi, shitja e të cilave do të përdoren për të financuar ndërtimin e kullës- tempull.
Forma të tjera financimi për këtë projekt janë edhe donacionet e besimtarëve./noa/a.k
