Në kuadër të trendeve të fundit dhe të tranzicionit që po ndërmerr energjia, Indeksi i Performancës së Infrastrukturës së Energjisë 2016 mundëson, përmes disa treguesve, vëzhgimin e progresit si dhe ofrimin e perspektivave të reja që sfidojnë ekonomi të ndryshme në botë.
Përpiluar nga Forumi Ekonomik Botëror, ky raport e rendit vendin tonë në top 20 shtetet më të mira botërore për nga infrastruktura e energjisë.
Shqipëria gjendet në vendet kryesore të listuara për nga pikët më të larta të këtij studimi, e renditur e 17-ta nga 125 ekonomi të ekzaminuara, duke lënë shumë pas vende të tjera të rajonit si Serbia, e 74-ta dhe Bosnja e Hercegovina, e 94-ta. Por, duket se krahasuar me një vit më parë, vendi ynë ka humbur 2 shkallë. Një ndër indikatorët e përmirësuar të vendit tonë është, sipas raportit, nxitja e gjenerimit të energjisë elektrike të dekarbonizuara, gjë që reflektohet në rezultatet mesatare të qëndrueshmërisë mjedisore.
Sipas raportit, tre vendet me performancën më të mirë janë: Zvicra, Norvegjia dhe Suedia. Tre të fundit janë: Jemeni, Libia, Bahreni.
Studimi është mbështetur në tregues si të dhënat e përgjithshme, ripërdorja, cilësia, mbulimi, përshtatja etj. ndërsa tre kapilarët kryesorë të marrë në konsideratë janë zhvillimi ekonomik, përshtatja e mjedisit dhe aksesi në energji.
Raporti i përpiluar nga Forumi Ekonomik Botëror, pavarësisht renditjes, jep disa sugjerime për shtetet e ekzaminuara, përfshirë edhe Shqipërinë:
– Pavarësisht përpjekjeve të konsiderueshme të politikave në mbarë botën, të progresit në përmirësimin e intensitetit të energjisë, ende një pjesë e tyre nuk kanë arritur zhvillimin e duhur.
– Kalimi në një sistem me më pak energji të karbonit intensiv po ndodh, por ngadalë – më shumë se një e treta e vendeve kanë një përqindje prej 10 % të burimeve jo-karbon në furnizimin e përgjithshëm i energjisë primare.
– Varësia nga importi është në rritje në shumë vende, megjithatë duket se kjo pikë po përmirësohet, përmes rritjes së diversitetit të furnizimit, me një mesatare prej 0.69 për këtë tregues
– Qasje në Energji (aksesi) mbetet një sfidë e rëndësishme për numrin e ekonomive më pak të avancuara.
