Forcat e armatosura të Estonisë kanë nisur një operacion detar për të mbrojtur një kabllo energjie nënujore pasi disa u dëmtuan në Detin Baltik në ditën e Krishtlindjes.
Sipas mediave të huaja, autoritetet finlandeze dyshojnë se një anije që është pjesë e të ashtuquajturës flotë hije të Rusisë, cisterna të vjetra që kërkojnë të shmangin sanksionet ndaj naftës ruse, ishte përgjegjëse për incidentin.
Hetuesit besojnë se anija e regjistruar në Ishujt Kuk, e quajtur si Eagle S, ka dëmtuar ose ka thyer katër linja interneti me spirancën e saj, shkruan A2 CNN.
Ministri i Jashtëm i Estonisë Margus Tsahkna tha sot nëse ekziston një “kërcënim për infrastrukturën kritike nënujore” në rajon, “do të ketë gjithashtu një përgjigje” pasi ai konfirmoi se marina do të patrullojë zonën për të mbrojtur një kabllo të njohur si Estlink 1.
Dy kabllo me fibra optike që lidhin Finlandën dhe Estoninë u thyen, një i tretë gjithashtu besohet i dëmtuar dhe një i katërti midis Finlandës dhe Gjermanisë ndoshta është shkëputur, sipas agjencisë finlandeze të transportit dhe komunikimit Traficom.
Në anije hipi një ekuipazh i rojes bregdetare finlandeze dje, duke e çuar anijen në ujërat e Finlandës, tha një zyrtar i rojes bregdetare në një konferencë për shtyp.
Robin Lardot, drejtor i Byrosë Kombëtare Finlandeze të Hetimit, tha se ata po hetojnë “sabotim të rëndë”.
“Sipas të kuptuarit tonë, një spirancë e anijes që është nën hetim ka shkaktuar dëmin”, shtoi ai.
