Në mbledhjen e radhës të Këshillit Bashkiak të Elbasanit, grupi i këshilltarëve të opozitës mbërriti me një vonesë prej 15 minutash. Për një kohë të gjatë, ata qëndruan në këmbë dhe refuzuan të uleshin në vendet e përcaktuara në shenjë proteste.
Atmosfera u tensionua më tej kur këshilltarja e Partisë Demokratike, Doris Madhi, mori fjalën për të ngritur shqetësime serioze në lidhje me Inceneratorin e Elbasanit.
“Inceneratori i Elbasanit nuk është mall pa zot, aq më pak kalë beteje që mund të shalohet vetëm gjatë fushatave elektorale!”, u shpreh ajo me tone të ashpra.
Sipas këshilltares Madhi, denoncimet e saj për këtë çështje datojnë që prej vitit 2022 dhe kanë vijuar pandërprerë deri më sot. Ajo theksoi se në rendin e ditës së kësaj mbledhjeje mungonte sërish kontrata e Inceneratorit ,një dokument që sipas saj, ka mbetur pezull që prej votimit kundër në janar të këtij viti.
“Si mund të funksionojë një kontratë që nuk është rinovuar? Si paguhen punonjësit? Pse Bashkia e Elbasanit, si aksionere mazhoritare, nuk sjell asnjë dokumentacion për aktivitetin dhe koston reale të menaxhimit të mbetjeve?”, pyeti ajo para këshillit, duke ngritur shqetësime për mungesën e transparencës.
“Ku po shkojnë 7 milionë euro?”, ishte një tjetër pyetje e fortë që u hodh në sallë, duke reflektuar shqetësimin e thellë të opozitës mbi mënyrën e administrimit të fondeve publike.
Në përfundim të fjalës së saj, Doris Madhi u bëri thirrje qytetarëve të reagojnë: “Zëri opozitar në këshill ka nevojë për mbështetje qytetare!
Qytetarë, nëse ju dhimbset jeta juaj dhe e fëmijëve që po rriten brenda një flluske kancerogjene, bashkohuni me ne në mbledhjen e nesërme! Kjo nuk është politikë, as propagandë, por detyrim ndaj jetës!”.
Edhe këshilltari i PSD ,Erion Murataj , ishte në të njënjtën linjë me Madhin për çështjen e mos funksionimit të incinieratorit dhe krijimin e malit gjigand me plehra në Elbasan ku depozitohen mbetje nga tetë qytete.Pas këtyre denoncimeve këshilltarët e opozitës bojkotuan mbledhjen e këshillit bashkiak.
