Ish-ministri i mjedisit, Lefter Koka, rrezikon të dënohet me 10 vite burg në lidhje me akuzat për inceneratorin e Elbasanit. Prokuroria e Posaçme kërkoi deklarimin fajtor të Kokës për akuzat e korrupsionit, shpërdorimit të detyrës dhe pastrimit të parave.
Për shkak të gjykimit të shkurtuar, dënimi i mundshëm i Kokës reduktohet në 6 vjet e 8 muaj burg. Për ish-sekretarin e përgjithshëm të Ministrisë së Mjedisit, ish-deputetin e PS, Alqi Bllako, SPAK kërkoi 4 vjet heqje lirie, duke e konsideruar fajtor për “shpërdorim të detyrës”.
Lefter Koka: 10 vite burg, për shkak të gjykimit të shkurtuar, kërkohen 6 vite e 8 muaj.
Alqi Bllako: 7 vite burg, për shkak të gjykimit të shkurtuar kërkohen 4 vite e 8 muaj burg
Mirel Mërtiri: 10 vite burg. Për shkak të gjykimit të shkurtuar, kërkohen 6 vite e 8 muaj.
Stela Gugallja: 7 vite burg. Për shkak të gjykimit të shkurtuar, kërkohen 4 vite e 8 muaj.
Klodian Zoto: 10 vite burg. Për shkak të gjykimit të shkurtuar, kërkohen 6 vite e 8 muaj.
Pretenca e SPAK
Dy ish-zyrtarët e Mjedist i kishin zgjedhur të mos merrnin pjesë në seancën ku u kërkua fajësia e tyre, ku u përfaqësuan nga avokatët. Dënime me nga 4 vite burg u kërkuan edhe për ish-anëtarët e Komisionit të Vlerësimit të ofertave, të akuzuar për “shpërdorim të detyrës”. Dënim me nga 10 vite burg rrezikojnë edhe dy biznesmenët e inceneratorëve, të shpallur në kërkim, Klodian Zoto e Mirel Mërtiri, të akuzuar për “korrupsion” e “pastrim parash”, ndërsa për Stela Gugalljen u kërkuan 7 vite.
Po sipas SPAK, Koka ka përfituar një ryshfet prej gati 308 milionë lekë të rinj, përmes një skeme fiktive pjesë e së cilës janë bërë biznesmenët Gugallja, Zoto e Mërtiri. Lëvrimi i parave nga buxheti i shtetit, u bë përmes pagesave të disa shoqërive përpunime të pakryera në incenerator, por të bëra vetëm në letra.
Në pretencë, SPAK kërkoi edhe mbylljen e NIPT-it për shoqëritë “Albtek Energy” dhe “Integratet Technology Servises”, si edhe konfiskimin e pasurive të luajtshme e të paluajtshme të tyre, konfiskimin e pasurive të 4shoqërive të tjerë, mes të cilave 8 apartamente, si edhe 88% të aksioneve të Lefter Kokës në një kantinë pijesh alkoolike. Konkluzionet e mbrojtjes do të dëgjohen nga gjykata në 1 qershor.
/f.stafa
