Përmes një postimi në Facebook, ministri i Infrastrukturës dhe Energjisë, Enea Karakaçi, bën me dije se është nënshkruar një marrëveshje me OSHEE-në dhe BERZH-in. Kjo e fundit, për financimin e ndërtimit të nënstacionit të ri në qendër të Tiranës.
“Ky projekt energjetik 110/20kV është unik në llojin e tij, pasi do të ndërtohet në nëntokë, duke garantuar siguri dhe furnizim të qëndrueshëm me energji elektrike për të ardhmen. Me një investim prej 22.5 milionë euro, projekti është në përputhje me Planin e Masave për Qytetin e Gjelbër të Tiranës (GCAP), në kuadër të programit “Green Cities” të BERZH-it”, shkruan ministri, krahas fotove.
Kujtojmë se Karakaçi e mori detyrën më 6 mars, duke pasuar Belinda Ballukun. Siç e ka theksuar edhe kryeministri Edi Rama herë pas here, objektiv kryesor në këtë dikaster është “Shqipëria me sovranitet energjitik deri në vitin 2030”.
“Shqipëria, nga një vend i varur nga importet, të kthehet brenda vitit 2030 në një vend eksportues dhe që të kemi mundësi të kemi një sovranitet energjetik. Një tjetër element i rëndësishëm është eficenca e energjisë. Patjetër kemi pasur programe për mbështetjen e eficencës së energjisë, por mendoj që këtu është vendi ku mund të bëjmë përsëri më shumë.
Nuk ia kemi dalë aq sa duhet të kemi një fond të eficencës së energjisë dhe për këtë jemi duke punuar shumë seriozisht me një nga financuesit ndërkombëtar, që të krijojmë një fond financimi dhe fond eficence energjie, që të kemi mundësi të kemi programe të vazhdueshme për eficencën e energjisë”, ka deklaruar më herët ministri.
