Shahe Kabashi është kërrusur edhe më shumë 15 ditët e fundit. Burgosja e djalit të saj 46- vjeçar e ka tronditur, e ka dërrmuar. E vetmuar në banesën trekatëshe, në fshatin Rrashbull të Durrësit, 77-vjeçarja, nënë e 5 fëmijëve, akuzon policinë për ndërhyrjen brutale ndaj të birit që është i sëmurë mendor, duke e akuzuar për pengmarrjen e mbesës 11- vjeçare. “Nuk është e vërtetë që Arbeni e mori peng vajzën që e kemi gjakun tonë, por e kërkoi të vinte në shtëpi që t’i lidhte fishat e kompjuterit. Nipi im, babai i vajzës lajmëroi policinë për pengmarrje. Pastaj piu birra dhe qerasi policët, të cilët më shkatërruan shtëpinë dhe djalin për pak e dogjën të gjallë”, – tha e moshuara.
Ndërkohë, ajo u shpreh se i biri është dhunuar barbarisht pas arrestimit, derisa ai nuk e ka njohur atë, nënën e tij. Në një intervistë për “GSH”, Shahe Kabashi tregon me detaje ngjarjen e ndodhur më 15 gusht të këtij viti, kur Arben Kabashi u arrestua nga forcat speciale, të cilat përdorën dhe gaz neoparalizues. Përmes lotësh, 77-vjeçarja akuzon të gjithë efektivët që u përfshinë në aksion, ndërsa bën apel që organet kompetente të kujdesen për të birin, i cili ndodhet në paraburgimin e Durrësit.
Zonja Shahe, çfarë ndodhi më 15 gusht të këtij viti?
Si ta harroj atë ditë, që mos qofsha më mirë! Që në mëngjes, Beni shkoi poshtë në dyqan dhe bleu një kartë për telefonin. Donte të fliste me vëllezërit e tij në Angli. U kthye në shtëpi dhe më pas shkoi te nipi dhe i tha vajzës së tij të vogël që ta ndihmonte të rregullonte fishën e kompjuterit, pasi donte të fliste me të vëllain, Ymerin në Angli. Vajza erdhi dhe po merrej në dhomë me kompjuterin.
Ku ishit ju në atë moment dhe çfarë lidhjeje keni me familjen e vajzës?
Isha në shtëpi dhe po bëja gati mëngjesin. Unë e kam vajzë vëllai, nënën e vajzës së vogël, ndërsa të shoqin e saj kam po nip nga burri. Vajza po rregullonte kompjuterin, kur pamë se shtëpia ishte rrethuar për pesë minuta me 20 policë.
Po më pas, çfarë ndodhi?
Kur u rrethua shtëpia nga policia, djali u tremb jashtëzakonisht shumë. Beni gjysmë njeriu ishte, tani me atë që bënë e kanë luajtur fare nga mendtë e kokës. Ai ka vuajtur 22 vjet në burg në Itali. Kur policia rrethoi shtëpinë, ai mori thikën e bukës dhe donte të vriste veten. Ai është u sëmurë, por pse e bënë më keq?! Rrinte në portën e shtëpisë dhe mbante thikën në dorë e thoshte se do të vriste veten. Edhe vajza u frikësua kur pa policinë. Të gjithë ne u frikësuam. Nga policët Beni kishte shumë frikë dhe nuk dilte jashtë. Unë dola në dritare të shikoja, kur disa policë shqyen kangjellën e më nxorën nga dritarja. Më pas shqyen kangjellat e të gjitha dritareve të shtëpisë, nxorën edhe mbesën. Djali im qëndronte në portë e thoshte që do ti bënte keq vetes po të hynte policia, pasi ishte bërë shumë nervoz.
Zonjë, kur ndërhyri policia, ku ishit ju?
Unë isha jashtë në oborr. Policët me skafandra e me armë në dorë hynë nga dritaret, ndërsa disa të tjerë hynë nga dera me një tub me gaz. Beni qëndronte pas derës kryesore në sallon. Aty ma helmuan djalin, e qëlluan dhe e bënë gjak të gjithë shtëpinë. I vunë gazin dhe një divan u dogj. Shkatërruan dyer e dritare. I vura prapë javën që shkoi, pasi kisha frikë se do më mbysnin natën. Pastaj policët e arrestuan djalin, ndërsa nipi që bëri të gjithë këtë teatër duke lajmëruar policinë nisi të pinte. Ai qerasi me birra policët./GSH/a.m.
