Ministri i Punëve të Brendshme të Kosovës, Xhelal Sveçla, ka reaguar ndaj disa raportimeve për ikje masive të qytetarëve drejt vendeve të BE-së, pas hyrjes në fuqi të liberalizimit të vizave, duke thënë se ato janë të pavërteta.
Në një postim në Facebook, ministri Sveçla ka theksuar se sipas të dhënave nga pikat kufitare, nga 1 janari i këtij viti, kur hyri në fuqi heqja e viza, e deri më sot, në Republikën e Kosovës nga të gjitha pikat kufitare kanë hyrë 3.687 autobusë, ndërsa kanë dalë nga të gjitha pikat kufitare 2.408 autobusë.
“Për të njëjtën periudhë kohore, në vitin që lamë pas kanë hyrë 3.511 autobusë ndërsa kanë dalë nga pikat kufitare 3.731 autobusë. Pra, 35% më pak autobusë kanë dalë këtë vit pas liberalizimit të vizave sesa në vitin e kaluar”, shkroi Sveçla në Facebook.
Sipas tij, një gjë e tillë dëshmohet nga Stacioni i Autobusëve në Prishtinë dhe nga të dhënat e Policisë së Kosovës/Departamenti i Kufirit se nuk bëhet fjalë për ikje masive të qytetarëve apo flukse të autobusëve.
“Procesi i menaxhimit të udhëtimeve pas liberalizimit të vizave është duke shkuar në mënyrën më të mirë të mundshme dhe u jam mirënjohës stafit të aeroportit, zyrtarëve tanë policorë atje, si dhe zyrtarëve policorë kudo në pikat tona kufitare”, shkroi Sveçla.
/f.s
