Agim Neza nuk jeton më. Ai u shua pas një lufte të gjatë me një sëmundje të pashërueshme në një moshë ende të re, shumë të re. Miku i të gjithë gazetarëve, studentëve, promovuesi i botimeve njohëse aq interesante për Shqipërinë, zyrtari serioz dhe gjithmonë korrekt e me integritet, sot nuk jeton më.
Ikja e Agim Nezës ka shokuar shumëkënd që e ka njohur, këtë mëngjes. Lajmi i dhimbshëm erdhi nga Amerika e largët, atje ku ai jetonte prej kohësh dhe ku vazhdoi gjatë një viti e gjysëm betejën e tij të fundit për jetën. Neza i takon atij brezi gazetarësh e publicistësh të viteve ‘90, të cilët e ndërthurën karrierën profesionale me angazhimin në jetën publike e institucionale. Këshilltar e zëdhënës në shumë institucione të rëndësishme si Kuvendi, ministria e jashtme, ministria e drejtësisë dhe prokuroria e përgjithshme, Agimi ishte gjithashtu edhe pedagog dhe një anglishtfolës i shkëlqyer.
Largimi i Agim Nezës le pas një boshllëk të pazëvendësueshëm. Kemi humbur një profesionist serioz, një gazetar të talentuar dhe tejet korrekt, një nëpunës shembullor të shtetit dhe mbi të gjitha një njeri të mirë.
Redaksia e Javanews i dërgon ngushëllimet më të sinqerta familjes së tij, shokëve e miqve të panumërt që patën fatin ta njohin Gimin.
