Nga akti i parë i dekriminalizimit buzëqesh maxhoranca qeverisëse…prokuroria ka publikuar këtë të martë të dhënat se 3 persona, dy deputetë dhe një kryebashkiak kanë falsifikuar dokumentat e dekriminalizimit.
Kësisoj, largohet deputeti i LSI-së Shkëlqim Selami, një goditje në dukje të parë për LSI-në, por jo për Ilir Metën, i cili nuk ka patur raporte të mira me deputetin. Pavarësisht se deputeti Selami ishte pjesë e LSI-së, relatat më të mira politike, i gëzonte me kryeministrin Rama, sesa me kryetarin e LSI-së.
Nga ana tjetër, largimi i deputetit të PDIU-së Dashamir Tahiri dhe zëvendësimi i tij me një tjetër emër të listës së çamëve, është një plus për socialistët dhe natyrisht për vetë Idrizin.
Për socialistët sepse kur u bë koalicioni mes PS dhe PDIU-së, Dashamir Tahiri qe kundër vendimit dhe e deklaroi veten pjesë të të djathtëve. Në këtë sens zëvendësimi i tij do t’i shtonte një tjetër votë shumicës së Ramës. Për vetë PDIU-në dhe kryetarin e saj Idrizi, sepse prej kohësh tashmë në grupin e tij të deputetëve, vota dhe qëndrimet e Dashamir Tahirit, ishin të lëkundura, në kundërshtim me rradhitjen e majtë të PDIU-së.
Por nuk duhet harruar se një goditje ka marrë dhe Kryeministri Edi Rama, i cili ka qenë në rreshtin e parë të atyre personave që kanë mbrojtur kryebashkiakun e Kavajës Elvis Roshi, muaj më parë, kur me zbardhjen e listave të dekriminalizimit, rezultonte se Roshi kishte rreth pesë emra./java/a.k
