Shkencëtarët janë ende duke ekzaminuar një variant të ri të Covid-19, të zbuluar për herë të parë në Francën jugore vitin e kaluar, për të përcaktuar nëse ai mund të bëhet një variant “shqetësues” në të njëjtën mënyrë si mutacioni Delta dhe Omicron, raporton independent.
Megjithatë, analizat e deritanishme të ekspertëve tregojnë se aktualisht ky variant nuk është për t’u shqetësuar.
I quajtur jozyrtarisht IHU – si një shenjë drejtuar grupit të studiuesve nga instituti “IHU Mediterranee Infection”, në Marsejë, të cilët po e studiojnë atë, varianti i ri B.1.640.2 ka infektuar deri më tani 12 persona që jetojnë në juglindje të Francës
Rasti i parë i IHU ishte i lidhur me dikë që kohët e fundit kishte udhëtuar në Kamerun, Afrikën perëndimore, për një udhëtim tre-ditor. Kështu tha grupi i shkencëtarëve në një punim në lidhje me gjetjet e tyre, i cili u botua në faqen e internetit medRxiv .
Përveç 12 rasteve të infektuara, aktualisht nuk ka asnjë rast tjetër të njohur të variantit IHU, i cili u regjistrua për herë të parë në bazën e të dhënave të gjurmimit të variantit GISAID më 4 nëntor.
Në analizën e tyre, autorët e përshkruan atë si “një variant të ri me origjinë kameruniane”, megjithatë nuk dihet ende se nga erdhi në të vërtetë IHU.
Çfarë është unike për variantin e ri?
Derisa variante të reja të Covid-19 po përhapen gjatë gjithë kohës, ekspertët thanë se ky variant është i veçantë për faktin se ka 46 mutacione – të cilat mund ta bëjnë atë më rezistent ndaj vaksinave që aktualisht po administrohen.
Autorët shtuan në analizën e tyre se mutacionet nuk ishin vërejtur në vende të tjera dhe se personi që u identifikua për herë të parë me IHU ishte plotësisht i vaksinuar kundër Covid.
Në studimin që po rishikohet edhe më tej, u zbulua gjithashtu se proteina spike e variantit të ri mbart 14 zëvendësime të aminoacideve, duke përfshirë N501Y dhe E484K.
Shumica e vaksinave që përdoren në mbarë botën janë të shënjestruara në proteinën e majës së Sars-CoV-2 – virusi që shkakton Covid-19 – dhe të dy mutacionet N501Y dhe E484K janë gjetur më parë në variantet Beta, Gamma, Theta dhe Omicron.
“Këto të dhëna janë një shembull tjetër i paparashikueshmërisë së shfaqjes së varianteve të Sars-CoV-2 dhe i futjes së tyre në një zonë të caktuar gjeografike nga jashtë”, thanë shkencëtarët që studiojnë variantin e ri.
Ata shtuan se “zbulimi i mëvonshëm … i tre mutacioneve në gjenin spike për të ekzaminuar për variante… nuk korrespondonte me modelin e variantit Delta të përfshirë në pothuajse të gjitha infeksionet Sars-CoV-2 në atë kohë”.
Kjo, thanë ata, theksoi rëndësinë e “mbikëqyrjes gjenomike” në luftën kundër Covid-19.
Çfarë thonë shkencëtarët për të?
Derisa ekspertët vazhdojnë të punojnë shumë për të përcaktuar nëse IHU ka të ngjarë të bëhet një “variant shqetësues”, një epidemiolog ka thënë se zbulimi i tij nuk do të thotë se do të jetë aq i rrezikshëm sa llojet e tjera.
“Ajo që e bën një variant më të njohur dhe më të rrezikshëm është aftësia e tij për t’u shumuar për shkak të numrit të mutacioneve që ka në lidhje me virusin origjinal,” tha Eric Feigl-Ding, një bashkëpunëtor në Federatën e Shkencëtarëve Amerikanë, në një shkrim në Twitter.
Ndërsa, Maria Van Kerkhove, epidemiologia e sëmundjes infektive e Organizatës Botërore të Shëndetësisë (OBSH), shkroi në Twitter rreth variantit të ri, duke thënë se ishte shënuar si një “variant nën monitorim” nga OBSH në të njëjtin muaj.
Klasifikimi nënkuptonte se ai ishte përcaktuar si një variant me “ndryshime gjenetike që dyshohet se ndikojnë në karakteristikat e virusit me disa tregues, se mund të përbëjë një rrezik në të ardhmen, por provat e ndikimit fenotipik ose epidemiologjik janë aktualisht të paqarta”.
Ndërkohë, virologu Tom Peacock, i Departamentit të Sëmundjeve Infektive të Kolegjit Imperial, në Londër, tha se varianti ka pasur “një shans të mirë për të shkaktuar telashe, por kurrë nuk u materializua me të vërtetë”. Ai shtoi: “Nuk ia vlen të shqetësohesh shumë për momentin.”/The Independent/
/b.h
