Identikitin e presidentit e gjetën, tani duhet vetëm emri. Lëvizja Vetëvendosje dhe Lidhja Demokratike e Kosovës janë shumë pranë zgjidhjes së krizës politike, për të shmangur edhe një palë zgjedhje të tjera të jashtëzakonshme.
Por Albin Kurti dhe Lumir Abdixhiku e lanë Kosovën me një pikëpyetje të madhe: si duhet të jetë presidenti apo presidentja e re e vendit? Një mendim për këtë e ka edhe ish-anëtari i Gjykatës Kushtetuese, Kadri Kryeziu.
“Duhet t’i ketë 35 vjeç dhe duhet të jetë rezident dhjetë vitet e fundit në Kosovë. Pastaj, konsensual nënkupton një person i cili i sheh partitë politike të njëjta dhe të mos i shohë partitë politike si kundërshtarë.
Në bazë të Kushtetutës, presidenti është faktor i unitetit, i cili ka për detyrë bashkëpunimin e partive politike parlamentare. Po ashtu, ka për detyrë ruajtjen e rendit juridik dhe kushtetues të vendit. Duhet të jetë një njeri normal, që ka njohuri politike dhe ka përvojë institucionale…”, tha Kadri Kryeziu, ish-anëtar i Gjykatës Kushtetuese
Më pas vjen edhe pyetja tjetër: A ka një të tillë Kosova që ta vendosë në karrigen e presidencës?
“Ka njerëz mjaftueshëm të tillë në Kosovë. Nuk duhet të kërkojnë diçka që nuk ka. Këta po kërkojnë diçka që nuk ka. Çfarë kategorie, çfarë karakteri duhet të ketë ai? Duhet të jetë njeri normal dhe sigurisht si presidentët e tjerë që kanë qenë.”, tha tha Kadri Kryeziu, ish-anëtar i Gjykatës Kushtetuese.
“Duke mos përmendur emra specifikë, ajo që vlerësojmë është shumë e rëndësishme: të zgjidhet fillimisht një president që i plotëson kushtet e përcaktuara me Kushtetutë dhe ligj, kjo është e para. E dyta, një president që mbron integritetin e zyrës së presidentit dhe ushtron në mënyrë adekuate kompetencat kushtetuese që ka presidenti.”, tha Gëzim Shala, Hulumtues në Institutin e Kosovës për Drejtësi
Kurti dhe Abdixhiku u ndanë me premtimin për t’u ritakuar sërish dhe kësaj here me emra konkretë, pasi të diskutojnë me anëtarët e partive respektive.
