Tri ditë pas grabitjes së 600 mijë lekëve punonjëses së Ujësjellësit në Kamëz, policia ka identifikuar autorin, ndërsa ka bërë të mundur arrestimin e bashkëpunëtorit të tij. Sipas bluve të Kamëz, është shpallur në kërkim shtetasi me inicialet E. (A.) Sh., 44 vjeç, banues në Durrës.
“44-vjeçari dyshohet se është autori i vjedhjes me dhunë ndodhur në Babrru Kamëz, rreth orës 07.30, 15.07.2016, në vendin e quajtur rruga “Halit Haxhia” Babrru Tiranë, nën kërcënimin e thikës, i ka marrë me dhunë nga dora çantën shtetases M. Ll., 54 vjeç, banuese në Babrru Tiranë, punonjëse e Ujësjellësit, ku brenda çantës dyshohet se kishte rreth 6 milionë lekë të vjetra”.
Ndërkaq, Specialistet e komisariatit Kamzë kanë vënë në pranga autorin e dyshuar si bashkëpunëtor shtetasin Afrim Serjani, 39 vjeç, lindur në Berat dhe banues në Durrës.
“Nga informacionet e marra në rrugë operative dhe veprimet procedurale u bë e mundur gjetja e automjetit tip “Renault” me targë AA903GX dhe automjeti tip “Opel” me targë AA481LB, mjete që dyshohet të jenë përdorur nga autori dhe bashkëpunëtori i tij.
Nga këqyrja e automjetit tip “Renault”, u gjet një kuti plastike ku në brendësi kishte një shumë parash metalike me një vlerë të përgjithshme 5046 Lekë të reja.
Po punohet intensivisht për kapjen e shtetasit E. (A.) Sh., 44 vjeç, të shpallur në kërkim lidhur me këtë ngjarje”, thuhet në njoftimin e policisë.
Materialet procedurale do t’i kalojnë Prokurorisë pranë Gjykatës së shkallës parë Tiranë, për veprën penale të “Vjedhjes me dhunë” e kryer në bashkëpunim.
bw/di
