Mauro Icardi ishte ‘bombarduesi’ i Interit sot në fitoren kundër Sampdoria-s. Kapiteni zikaltër realizoi 4 nga 5 golat duke marrë një 3 pikësh të rëndësishëm për zonën “Champions”.
Para këtij takimi 25-vjeçari ishte ndalur në kuotën e 99 golave me bluzën zikalter në “Seria A” dhe me 4 rrjetat e sotme ka kapur një numër me 3 shifra. Pas ndeshjes sulmuesi është shprehur shumë entuziazt për golin e 100, por edhe për ‘pokerin’,
“Në fakt nuk e kisha menduar se do shënoja 4 gola, por e ndjeja se do ta dërgoja topin në rrjetë një herë apo dy. Jam shumë i lumtur që tani kam shënuar 103 gola, pasi Seria A është një kampionat shumë i vështirë dhe jo çdo lojtar ia del të shënojë kaq shumë”, tha Icardi.
Përveç sulmuesit, duket se edhe Interi ka njohur shpërthimin e tij, pasi është rikthyer të bindë me lojë dhe rezultat, pikërisht në pjesën më të rëndësishme të sezonit.
“Me Napolin luajtëm mirë dhe sakrifikuam, por nuk ia dolëm të fitojmë. Kjo lloj ndeshjeje na duhet shumë për moralin. Trajneri na ngacmoi me deklaratat e tij dhe më vjen mirë që skuadra reagoi mjaft mirë. Tani të jemi të përqendruar dhe të sigurojmë Championsin”, tha kapiteni zikaltër. (BalkanWeb)
