Myrto Uzuni u largua nga Spanja dhe Europa në merkaton e janarit, për t’u bërë pjesë e skuadrës së Austin në SHBA. Sulmuesi i Kombëtares shqiptare është ambientuar shumë mirë në skuadrën e tij të re. Reportazhi i “Austin Chronicle” e krahason shqiptarin me Zlatan Ibrahimoviç. Në një intervistë për këta të fundit, Uzuni ka folur për karrierën e tij.
“Kam nisur të luaj që kur isha i vogël dhe sigurisht që jam rritur duke u stërvitur. Kjo ishte e vetmja rrugë që kisha në dispozicion për t’ia dalë. Nuk isha një djalë i një familjeje të pasur, më është dashur të punoj fort për të arritur deri këtu. Ishim një familje normale. I kam dedikuar kohën time futbollit, prandaj jam këtu sot. Nuk kisha fat, por kam punuar shumë.
Goli i parë me skuadrën e re erdhi vetëvetiu. Unë i shikoj gjërat më mirë sepse e lexoj shumë mirë lojën. Në moment që Buka po futej në zonë, i thërrita të mos ulte kokën dhe të ma pasonte mua topin. Ai bëri siç i thash dhe shënova.
Nuk mendoj se jam egoist apo të sjell këtë mentalitet në ekip. Unë dua që shokët të më shikojnë si shembull. Prandaj punoj fort, por kjo nuk do të thotë se nuk gaboj. Unë duhet të punoj shumë kështu të përmirësohem”, shprehet Uzuni.
