Është zbardhur dëshmia e pronarit të mobilerisë së qëlluar me breshëri plumbash mesnatën e kaluar në Nikël të Krujës. Policia vijon kërkimet për autorët e këtij agresioni, ndërsa pronari i biznesit, Myslym Karaj, ka pohuar para agjentëve policorë se nuk ka asnjë dyshim se kush mund t’ia ketë bërë këtë kërcënim.
Ai ka 20 vite që punon në këtë fushë dhe nuk ka pasur përplasje apo mosmarrëveshje me askënd: “As unë dhe as familja ime nuk i kemi borxh asnjë qindarkë njeriu. Nuk i kemi bërë keq askujt në jetën tonë”.
Biznesi ka qenë i moniotuuar me kamera, pamjet e të cilave janë marrë si elementë ndihmës apo prove për zbulimin e atyre që shkrehën armët në mesnatë, duke e bërë “shoshë” fasadën e mobilerisë.
Në momentin që Karaj ka shkuar në biznes për të hapur dyqanin, ka zbuluar se në drejtim të godinës ishte qëlluar me armë. Policia që shkoi në vendin e ngjarjes thotë se ka konstatuar disa shenja, që dyshohen se janë shkaktuar nga armë zjarri gjatë natës. Grupi hetimor po punon për sqarimin e rrethanave.
/a.r
