Mbretëresha Elizabeth kishte një dashuri të veçantë për kuajt gjatë gjithë jetës së saj, dhe pak gjëra mund ta emociononin më shumë sesa një bisedë për kalërimin.
Midis njerëzve që ndanin këtë dashuri me të ishte trajneri amerikan i kuajve Monty Roberts, me të cilin ajo zhvilloi një miqësi të papritur të ngushtë që nga viti 1989.
Njohja e tyre filloi kur Mbretëresha e ftoi atë në Mbretërinë e Bashkuar për të prezantuar metodat e buta të stërvitjes së kuajve që ai përdorte.
Roberts, i cili vdiq në moshën 91 vjeç, më 31 korrik 2026, mbeti në kontakt me Mbretëreshën Elizabeth për më shumë se tre dekada. Të dy shkëmbyen qindra telefonata dhe marrëdhënia e tyre ishte aq e ngushtë, sa ajo ishte një nga të paktët njerëz me të cilët Mbretëresha pranonte të fliste në telefon në çdo kohë.
Në fakt, në një intervistë në vitin 2023, Roberts tregoi një incident që ilustron këtë marrëdhënie unike.
Kur ai telefonoi në pallat në një moment dhe kërkoi të fliste me Mbretëreshën, një anëtar i stafit u përgjigj:
“Një moment ju lutem – Mbretëresha është në një takim me politikanë të Irlandës së Veriut”.
Robertsi tha se do të telefononte të nesërmen, por pak më vonë dëgjoi një zë të njohur në anën tjetër të linjës.
“Monty, çfarë po bën?”, i tha mbretëresha.
I habitur, ai u përgjigj se i kishin thënë se ishte në një takim. Pastaj Elizabeta shpjegoi se ajo ishte vërtet në takim, por shfrytëzoi rastin për t’u larguar për një moment dhe për të folur me të.
«Doja një rrugëdalje nga ai takim, kështu që tani jam në një dhomë tjetër duke folur me ty», thuhet se i tha ajo.
Roberts tha se kjo ishte e vetmja herë në 33 vitet e tyre të lidhjes që ajo për pak sa nuk iu përgjigj telefonatës së tij.
Ai e kishte ndihmuar mbretëreshën të kuptonte më mirë sjelljen e kuajve dhe të krijonte marrëdhënie besimi me ta, nëpërmjet një qasje më të butë ndaj stërvitjes së tyre.
“Nuk mund ta mashtrosh një kalë. Ajo më besoi dhe, Zot, unë do të preferoja të vdisja sesa ta mashtroja në çfarëdo mënyre “, kishte deklaruar ai.
Ishte Mbretëresha Elizabeth ajo që e inkurajoi të shkruante një libër dhe të udhëtonte nëpër Mbretërinë e Bashkuar duke prezantuar metodën e tij.
“Dua që bota ta dijë se çfarë bën ti”, i kishte thënë ajo.
Ndikimi i metodave të tij preku edhe anëtarë të tjerë të familjes mbretërore.
Nëna e Mbretëreshës Elizabeth u prek thellë kur e pa për herë të parë duke stërvitur kuaj të vegjël në Kështjellën Windsor.
“Ajo erdhi tek unë me lot në sy dhe tha: ‘Kjo është gjëja më e bukur që kam parë ndonjëherë në jetën time'”, kujtoi Roberts.
