Ngjarja tragjike në Shkodër, ku Armando Pali dhe Liridon Kraja u ekzekutuan teksa qëndronin në një lokal, është shfrytëzuar politikisht nga Sekretari i Përgjithshëm i Partisë Demokratike, Flamur Noka.
Ky i fundit përmes një postimi në facebook, nuk kurseu kritikat për uniformat blu të cilët i etiketon si “policia e karteleve” ndërsa thekson se qytetarët janë braktisur nga autoritetet.
“Policia e karteleve Ç’tjetër gjë prisni të ndodhë në një narkoshtet? U shuan duke u vrarë, por policia është në drejtim të paditur.
Kupola drejtuese u rri gatitu në këmbë karteleve të drogës. Kërbaçin e kanë vetëm për qytetarët, kurse terrorin patronazhist vetëm ku ka zgjedhje.
Misioni për rend e siguri ka mbetur në letër. Qytetarët janë të detyruar të garantojnë vetë sigurinë e familjes së tyre. Kurrë në 113 vite shtet nuk është braktisur kështu qytetari. Policia punon për kartelet dhe kartelet qeverisin”, shkruan Noka.
Por ajo që ka tërhequr vëmendjen në këtë postim është mënyra e paprecedentë se si Noka i është kthyer një komentuesi. Ky i fundit i kujtoi Nokës episodin ku ai vetë është filmuar duke ushtruar dhunë ndaj efektivëve të policisë gjatë një proteste.
“O muli do ta hash dhe ti p….e satëme, po prit dhe pak se ato grushta kundër policisë do t’i thyejnë dhëmbët më keq se Likja”, i shkruan komentuesi.
Në vend të një përgjigjeje të matur, siç do t’i takonte një funksionari publik, reagimi i Nokës ishte i denjë për gjuhë rruge: “Merr një brisk dhe eja na mbaro punë bashkë me policinë e karteleve.”
Nuk është hera e parë që Noka përplaset verbalisht me qytetarë në rrjetet sociale, duke mos kursyer fjalorin banal, fyes dhe kërcënues.
