Presidenti amerikan Donald Trump ka kërkuar nga shitësit e karburanteve në Shtetet e Bashkuara që të ulin menjëherë çmimet e benzinës, duke paralajmëruar “probleme të mëdha”, nëse nuk respektohet kjo kërkesë.
Në një postim në platformën e tij Truth Social, ai ka thënë se shitësit duhet të ulin çmimet “menjëherë” dhe ka theksuar se nuk do të tolerohet rritja e padrejtë e çmimeve.
Guvernatori i Kalifornisë Gavin Neusom, një demokrat dhe kritik i fortë i Trump, ka mbrojtur politikat e shtetit të tij që fokusohen në energjinë e rinovueshme dhe synimin për një rrjet elektrik neutral ndaj karbonit brenda dy dekadave.
Ndërkohë, administrata Trump ka ndërmarrë hapa për të riaktivizuar projekte energjetike, përfshirë edhe një tubacion në Kaliforni që ishte mbyllur pas një derdhjeje të madhe në vitin 2015.
Trump ka deklaruar gjithashtu se ka urdhëruar Departamentin e Drejtësisë të hetojë kompanitë e mëdha të naftës për çmimet e larta në pikat e karburantit, duke pretenduar se çmimet e naftës në tregun global po bien, por kjo ulje nuk po reflektohet tek konsumatorët.
Këto deklarata vijnë në një kohë kur rritja e çmimeve të karburanteve po ndikon drejtpërdrejt tek qytetarët amerikanë, ndërsa debati politik për energjinë, taksat dhe varësinë nga nafta po thellohet edhe më shumë në prag të zgjedhjeve të mesmandatit në SHBA.
