I shqetësuar për rritjen e infektimeve, Mustafa: E përjetova COVIDIN, është sëmundje atipike nuk ka rregulla shërimi

Kreu i LDK, Isa Mustafa tashmë prej 17 ditësh i infektuar me COVID-19 ka ndarë përvojën e tij me virusin.

Mustafa thotë se ky virus është një sëmundje atipike, që s”ka rregulla e standarde shërimi, dhe vetë ai edhe pse u trajtua në shtëpi nuk e pati të lehtë.

Ai i bën apel qytetarëve mos presin nga institucionet t’i mbrojnë por të bëhen policë e mjekë të vetvetes.
Pora nga ana tjetër i kërkon qeverisë që të ketë prioritet absolut vetëm COVID-19, të informohet sa më shumë publiku dhe të ndahet edhe euro-ja e fundit për shëndetin.

Statusi nga Isa Mustafa

Miq të nderuar

Më brengosi sot numri i të infektuarëve prej 276 me Covid-19. E përjetova keto ditë Covidin dhe e shoh për obligim të apeloj për kujdes maksimal. Eshtë një sëmundje atipike, që s’ka rregulla dhe standarde shërimi.
Të heqim dorë nga ahengjet, dasmat në masë, lëvizjet për pushime e rekreacion, protestat e tubimet, sepse po e shtojmë rrezikun e përhapjes së virusit.
Mos të presim që Qeveria, Ministria e shëndetësisë, institucionet Shëndetësisë, policia, inspektorët mund të na mbrojnë nga kjo pandemi, në qoftëse nuk respektojmë rend dhe rregulla. As vendet më të fuqishme nuk po e arrijmë këtë. Ne duhet të bëhemi policë të vetëvetes, mjekë të vetëvetes.

Mund të mbrohemi vet, nëse tregojmë kujdes dhe respektojmë rekomandimet e institucioneve shëndetësore dhe rregullat e Qeverisë.
Unë u trajtova në shtëpi, respektova dhe po respektoj në mënyre absolute rekomandimet dhe udhëzimet e mjekëve tanë. Nuk ishte e lehtë.
Është kjo luftë për të shpëtuar jetën tonë dhe të tjerëve. Duhet gjithë ne të vetëdijesohemi se nëse nuk e marrim seriozisht këtë pandemi atëherë neglizhojmë jetën tonë dhe të atyre me të cilët komunikojmë.

Apeloj qe institucionet shëndetësore të japin sa më shumë informata për qytetarët, që mediat ta kenë prioritet absolut mbrojtjen nga Covid-19 dhe që gjithë ne të mos bëjmë luftë politike por të ndërtojmë kulturë dhe ndërgjegje të respektimit të masave.
Të ndihmojmë dhe të përkrahim punonjësit shëndetësorë dhe SHSKUK që të organizojë hapësirë për të sëmurit në tërë Kosovën. Të ndajmë edhe euron e fundit për shëndetin! IM

/e.rr